فاضل کا بلاگ

نگہ بلند، سخن دل نواز، جاں پر سوز ۔۔۔۔۔ یہی ہے رخت سفر میر کارواں کے لیے

2010-11-10T12:10:00.000+03:30

بسم اللہ الرحمن الرحیم

کچھ لوگ ہوتے ہیں کہ جب اپنی قوم میں کسی خامی یا پستی کا احساس کرتے ہیں، قومیت بدلنے کی جگہ، قوم کو بدلنے کہ کوشش کرتے ہیں۔ اپنی زندگی میں ہزاروں جتن کرتے ہیں تاکہ ان کی قوم صحیح راستے پر آجائے۔ ایسے لوگوں کا انجام یہ ہوتا ہے کہ جب اپنا کام پورا کرتے ہیں اور دنیا ان کو پہچانتی ہے، تب بجائے اس کہ کہ یہ کسی قوم میں شامل ہونے کی کوشش کریں، قومیں ان کو اپنے اندر سمونے کی کوشش کرتی ہیں۔ ہر قوم یہ کہتی ہے کہ یہ تو ہم میں سے تھے۔

کچھ اسی طرح کی ایک شخصیت آج سے ۱۳۳ سال پہلے، ۹ نومبر کو پیدا ہوئی۔ والدین نے تو محمد اقبال نام رکھا۔ لیکن دنیا نے نہ جانے کتنے القاب سے نوازا، علامہ، ڈاکٹر، مولانا، سر، حکیم الامت، شاعر مشرق، فیلسوف شرق ۔۔۔ اس کے بوجود خود یہ کہہ گئے:

مرا طریق امیری نہیں، فقیری ہے

خودی نہ بیچ، غریبی میں نام پیدا کر

آج تک قومیں یہ کہہ رہی ہیں، اقبال ہمارا تھا۔ پاکستان، ہندوستان، انگلستان، ایران اور نہ جانے کون کون اقبال کو اپنا مانتے ہیں، کوئی پیدائش کی وجہ سے تو کوئی زبان کی وجہ سے اور کوئی سلطنت کی وجہ سے۔ لیکن سوچنے والی بات یہ ہے کہ واقعا اقبال کس قوم کا ہے۔ کہنے کو تو ہم یہی کہتے ہیں کہ اقبال نے پاکستان کا تصور پیش کیا، تو پاکستانی ہے۔ لیکن کیا حقیقت میں ہم یہ کہہ سکتے ہیں کہ یہ وہی پاکستان ہے جو اقبال نے سوچا تھا۔ کیا صرف یہ کہنے سے کہ پاکستانی تھا، مزار پر پھول چڑھانے سے، پاکستان کا پرچم لگانے سے۔ اقبال کو پاکستانی شہریت دی جاسکتی ہے؟

اقبال ہمارا ہے۔ یہ ہم اسی وقت کہہ سکتے ہیں کہ جب ہم اقبال کو اپنے کردار سے پاکستانی بنائیں۔ اگر اقبال پاکستانی تھا۔ تو ہر پاکستانی کو ایک اقبال ہونا چاہیے۔ یہ اسی وقت ہو سکتا ہے کہ جب ہر پاکستانی علم کی اس چوٹی پر پہنچے کہ جس پر اقبال تھا، بلکہ اس سے بھی زیادہ اونچائی پر، بقول حضرت اقبال، وہاں تک کہ، "خدا بندے سے خود پوچھے بتا تیری رضا کیا ہے"۔ تب ہم فخر سے یہ کہہ سکتے ہیں کہ اقبال پاکستانی ہے۔ ورنہ خدا نخواستہ ہمیں وہ دن بھی دیکھنا پڑے کہ جب اقبال جیسی شخصیتوں کو ہم سے دوسری قومیں چھین لیں گی۔ خدا وہ دن نہ لائے۔ آمین

خیر یہ تو بس ایسے ہی لکھ دیا۔ اصل میں تو علامہ کی یاد تازہ کرنے کے لیے، ان کی ایک غزل پیش کرنا چاہتا تھا۔

نہ تو زمیں کے لیے ہے نہ آسماں کے لیے

جہاں ہے تیرے لیے، تو نہین جہاں کے لیے

یہ عقل و دل ہیں شرر شعلہ محبت کے

وہ کار و خس کے لیے ہے، یہ نیستاں کے لیے

مقام پرورش آہ و نالہ ہے یہ چمن

نہ سیر گل کے لیے ہے، نہ آشیاں کے لیے

رہے گا راوی و نیل و فرات میں کب تک

ترا سفینہ کہ ہے بحر بیکراں کے لیے

نشان راہ دکھاتے تھے جو ستاروں کو

ترس گئے ہیں کسی مرد راہ داں کے لیے

نگہ بلند، سخن دل نواز، جاں پر سوز

یہی ہے رخت سفر میر کارواں کے لیے

ذرا سی بات تھی، اندیشہ عجم نے اسے

بڑھا دیا ہے فقط زیب داستاں کے لیے

مرے گلو میں ہے اک نغمہ جبرئیل آشوب

سنبھال کر جسے رکھا ہے لا مکاں کے لیے

آئیں مل کر اقبال کو حقیقتا پاکستانی بنائیں

ان شاء اللہ

نو، نومبر، دوہزار دس عیسوی

قرآن کریم گیلری، قومی عجائب گھر، کراچی {ہفتہ کتب خانہ}۔

2010-08-09T18:30:00.000+04:30

بسم اللہ الرحمن الرحیم

آج سے تقریبا چھ سال پہلے، میں پہلی مرتبہ قومی عجائب گھر پاکستان گیا۔ یہ عجائب گھر، کراچی میں، ڈاکٹرضیاءالدین احمد روڈ پر واقع ہے۔ مجھے یہ عجائب گھر دیکھ کر بہت افسوس ہوا۔ کیونکہ جو میرے ذہن میں تصویر تھی قومی عجائب گھر کی، وہ اسے دیکھ کر اک دم چکناچور ہوگئی۔ صفائی صرف برائے نام، کولنگ سسٹم ندارد، حد تو یہ ہے کہ جب بارش ہوئی، عجائب گھر کی چھتوں کے نیچے بھی پانی برسنے لگا۔ خیر میں تو کوئی اور بات کرنا چاہ رہا تھا۔

کل چھ سال کے بعد دوبارہ اسی جگہ گیا۔ کوئی خاص تبدیلی نہیں آئی تھی، سب کچھ اسی طرح تھا۔ طالب علم ہونے کی وجہ سے پانچ روپے والا ٹکٹ لیا۔ اندر گئے۔ سب کچھ اسی طرح تھا۔ تحریک آزادی کی گیلری بند تھی۔ باقی سب ویسے ہی تھیں۔ یہاں تک کہ ہم قرآن کریم گیلری کے دروازے پر پہنچے۔ کنڈی لگی ہوئی تھی۔ ہم سمجھے کہ یہ بھی بند ہے۔ بہت افسوس ہوا کہ جس چیز کی وجہ سے آئے تھے، وہی بند ہے۔ لیکن وہاں موجود ایک محافظ نے ہم سے کھا کنڈی کھول کے اندر چلے جائیں۔ اندر گئے تو منظر ہی کچھ اور تھا۔ ہماری خوشی کی انتہا نہ رہی، تعجب بھی بہت ہوا کہ پاکستان میں کیا یہ بھی ہوسکتا ہے؟

چھ سال پھلے جب ہم یہاں آئے تھے، منظر کچھ یوں تھا۔ ہمارے پسینے چھوٹ رہے تھے گرمی سے۔ شیشے کے پیچھے قرآن کریم کے قلمی نسخے کھلے ہوئے ڈسپلے پہ رکھے تھے۔ اب سوچیں جس گرمی میں ہمارا حال برا ہو گیا تھا، اس میں ان قلمی نسخوں کا کیا حال ہوگا۔ اس طرح کی نگہداشت کا نتیجہ یہ ہوا کہ چند سال پہلے یہاں دیمکوں نے حملہ کردیا۔ اور الحمدللہ منتظمین کو اس بات کا خیال آیا کہ گیلری بند کی جائے اور یہاں کچھ تعمیرات کریں۔ گیلری شاید دو تین سال تک بند رہی، اور تعمیراتی کام ہوتا رہا۔ میری معلومات کے مطابق مئی دوہزار دس میں گیلری دوبارہ کھول دی گئی۔

اب اس کو دیمک کی برکت کھا جائے یا کچھ اور، مجھے نہیں معلوم لیکن اتنا بتا سکتا ہوں کہ جو ہوا بھہت اچھا ہوا۔

ہم گیلری میں داخل ہوئے۔ تو ایسا محسوس ہوا، بقول ہمارے عدیل بھائی کے، جیسے ہم کسی اور جگہ (ملک) آگئے ہیں۔ لگ ہی نہیں رہا تھا کہ یہ اسی قومی عجائب گھر کا حصہ ہے جہاں پانچ روپے کا ٹکٹ خرید کر آئے ہیں۔

داخل ہوتے ہی پتا چلا کہ بہت عمدہ کولنگ سسٹم لگا ہوا ہے۔ چند لوگوں کے نام بھی لکھے ہوئے تھے، جنہوں نے اس تعمیراتی کام میں حصہ لیا ہے۔ افسوس یہ ہے کہ میرے پاس اس وقت قلم کاغذ نہیں تھا، اور تصویر کھینچنا منع ہے۔ اس وجہ سے وہ نام لکھ نہ سکا۔ اب ایک دفعہ اور جانا پڑے گا۔ اندر بہت عمدہ، سادہ اور خوبصورت سلھیٹی رنگ کی دیواریں ہیں، جن میں شیشے کے سادہ مگر خوبصورف ڈسپلے بنائے گئے ہیں، ڈسپلے کے اندر وینٹیلیشن کے لیے خاص جگہ رکھی ہے، اور لال رنگ کے مخمل پر، قرآن کریم کے قلمی نسخے کھلے رکھے ہیں، ان کی تفصیل ان کے نیچے لکھی ہوئی ہے۔

یہاں ۵۲ قلمی نسخے منظر عام پر رکھے ہوئے ہیں، جبکہ قومی عجائب گھر میں کل ۳۰۰ قرآن کریم کے قلمی نسخے موجود ہیں۔ اس میں سب سے پرانا نسخہ جو مجھے نظر آیا وہ پانچویں صدی ہجری کا ہے۔ یہ سارے نسخے اس وقت تو بہت اچھی حالت میں رکھے گئے ہیں، امید ہے ہمیشہ اسی طرح ان کی دیکھ بھال ہوتی رہے۔

میری نظر میں جو شخص بھی کراچی آئے، یہ عجائب گھر اور خاص طور پہ یہ گیلری ضرور دیکھے۔

امید ہے کہ جس طرح یہ گیلری تیار کی گئی ہے، اسی طرح پورا عجائب گھر بہتر بنایا جائے۔ اور سب سے ضروری بات یہ ہے کہ ان سب چیزوں کی اچھی طرح مستقل دیکھ بھال ہوتی رہے، ایسا نہ ہو کہ ایک دفعہ بنا کر چھوڑ دیا جائے، بلکہ مستقل اس پر نظر رکھی جائے اور اسے خرابی سے بچایا جائے۔ اگر ایسا نہیں ہوا، تو یہ ساری محنت اور سارا خرچہ، سب بے کار رہے گا اور بہت جلد ضائع ہو جائے گا۔

اس عجائب گھر میں، ایک کتاب خانہ بھی ہے، جو میں نہیں دیکھ سکا کیونکہ میں ہفتہ کے دن گیا تھا اور کتابخانہ بند تھا۔ میری کوشش ہے کہ ایک دن کتابخانہ دیکھنے بھی وہاں جاوں۔ ان شاء اللہ۔

(Pakistan National Museum) نوٹ: قومی عجائب گھر = پاکستان نیشنل میوزیم

والسلام

سید محمد نقوی فاضل

۸۔اگست۔۲۰۱۰

ہمارا جانا، پانچ سال بعد پاکستان

2010-07-19T04:21:00.000+04:30

بسم اللہ الرحمن الحیم

ہر کسی کا ایک گھر ہوتا ہے۔ چاہے دنیا کے ہر شہر میں لاکھوں مکان ہوں، لیکن گھر ایک ہی ہوتا ہے۔

گھر وہ ہوتا ہے کہ جب انسان وہاں ہو، اسے سکون ملے، چاہے کتنی مشکلیں پڑیں۔ اپنائیت محسوس ہو، چاہے کتنا ہی تنہا ہو۔ سب لوگ اپنے لگیں، چاہے جتنے بھی انجان ہوں۔ جب وہاں کوئی مصیبت آئے، انسان جہاں بھی ہو اس کا دل دکھنے لگے۔ اور سب سے بڑی بات یہ ہے، کہ جب گھر سے دور ہو، اسے ایک شدید کمی، ایک درد کا احساح ہو، جسے عام طور سے غربت کا احساح کہتے ہیں۔

ہر درد کی طرح، غربت کو بھی وہی سمجھ سکتا ہے جو غربت میں رہا ہو۔

لیکن کوئی ایسی چیز دنیا میں نہیں ہے، جس میں اچھائی، خوشی یا کوئی بھی اچھا پہلو نہ ہو۔ اگر کوئی ایسی چیز ہے بھی تو بہت کم ہی ہوگی۔ کیونکہ ان اللہ جمیل و یحب الجمال۔

یہ سب باتین ایک طرف، اور کئی سال غربت جھیلنے کے بعد، گھر جانے کی خوشی ایک طرف۔ اس خوشی کا نقشہ کاغذ پر نہیں کھینچ سکتا۔ اگر یہ قدرت ہوتی تو شاید ایک بچے کی تصویر بناتا جو، اپنی چھوٹی سی دنیا میں مگن، ایک چاکلیٹ پانے کی خوشی میں ناچ رہا ہے۔ میرا بھی کچھ ایسا ہی حال ہے، فرق اتنا ہے کہ اس عمر میں اگر یہ حرکت کر ڈالی، تو شاید مجھے، پاگل خانہ بھیج دیا جائے۔ بچپنے کا بھی کیا خوب زمانہ ہوتا ہے، انسان کھل کے اپنے خالص احساسات کا اظہار کرتا ہے، لیکن وقت کے ساتھ یہ خلوص نقابوں کے پیچھے چھپ جاتا ہے۔ یہاں تک کہ انسان اپنی خوشی کا اظہار بھی کھل کر نہیں کرسکتا۔

خیر اب میں لگ بھگ پانچ سال کے بعد، دوبارہ اپنے گھر، پاکستان، جا رہا ہوں۔ خوشی کا عالم قابل بیاں نہیں ہے۔ پاکستان پہنچنے میں چار دن رہتے ہیں۔

مجھے یہ فکر ہے کہ پانچ سال پہلے میرا گھر کس حال میں تھا، اور آج کس حال میں ہے۔ مہنگائی، بدامنی، بجلی کی چھٹیاں اور نہ جانے کتنی مشکلیں بڑھ گئی ہیں، یہ سب معلوم ہے۔ لیکن پھر بھی مجھے جانا ہے۔ گھر، گھر ہوتا ہے۔ بقول مرحوم فراز کے:

فراز سنگ ملامت سے داغ داغ سہی

ہمیں عزیز ہے خانہ خراب جیسا

اس فرق کے ساتھ، کہ ہمارا پاکستان خراب نہ کبھی تھا، نہ ہے اور نہ کبھی ہو گا، ان شاء اللہ۔ ہاں خراب کرنے کی کوشش کی جارہی ہے، جو ان شاء اللہ، ناکام رہے گی۔

اب ملیں گے پاکستان میں ان شاء اللہ

صاحب معراج کی گودی میں ہیں حیدر

2010-06-26T09:03:00.000+04:30

بسم اللہ الرحمن الرحیم

یہ غل کیسا ہے، اور اتنا سہانا کیوں ہے یہ منظر؟

یہ فواروں کے ہاتھوں کیوں لٹائے ہیں حسیں گوہر؟

زمیں سے آسماں تک کیوں چڑھی جاتی ہیں یہ بیلیں؟

میں سمجھا، صاحب معراج کی گودی میں ہیں حیدر

از: علامہ سید مرتضی حسین صدرالافاضل (فاضل لکھنوی)۔

یوم ولادت امیرالمومنین امام علی بن ابیطالب ع

۱۴۳۱

تہران یونیورسٹی میں اردو

2010-05-27T17:54:00.001+04:30

بسم اللہ الرحمن الرحیم

دانشگاہ تہران، ایران کی سب سے پہلی یونیورسٹی ہے۔ مجھے اس بات کا علم نہیں تھا کہ اس میں اردو کا شعبہ بھی ہے۔ اس وقت اس بارے میں معلوم ہوا، جب اردو محفل میں، یونس عارف صاحب سے آشنائی ہوئی۔ یونس عارف صاحب، ہمدان کے رہنے والے ہیں، اور علامہ اقبال سے متاثر ہو کر، اردو ادب میں بیچلرز کررہے ہیں۔ اردو محفل کی برکت سے مجھے تہران یونیورسٹی کے اردو ڈیپارٹمنٹ جانے کا موقع ملا، جس کی روداد یہاں لکھ رہا ہوں۔

میں اپنے دوستوں کے ساتھ، ایک کام کے سلسلے میں، تہران گیا تھا، تو سوچا کہ کیوں نہ تہران یونیورسٹی کے اردو ڈیپارٹمنٹ کی بھی زیارت کر لی جائے۔ چنانچہ عارف صاحب کو فون کر کے، میں اور میرے دوست سید یاسر عباس شمسی، دانشکدہ تربیت بدنی دانشگاہ تہران (Faculty of Physical Education and Sport Sciences, University of Tehran) کی جانب روانہ ہوئے۔ یہ فیکلٹی بہت بڑے رقبے پر ہے، اور اصل یونیورسٹی سے دور ہے۔ اسی کے ساتھ دانشکدہ زبان ہائے خارجی (Faculty of Foreign Languages) اور دانشکدہ مطالعات جہانی (Faculty of World Studies) کی عمارتیں قائم ہیں۔ یہ دونوں فیکلٹیز آمنے سامنے ہیں۔

دانشکدہ مطالعات جہانی کو دیکھ کر مجھے تعجب ہوا۔ کیونکہ نام تو 'جہانی' ہے، اور کام بھی دنیا بھر کی اقوام کا مطالعہ ہے، لیکن دروازہ سے ایسا لگ رہا تھا کہ ایران کی تاریخ سے متعلق ہے۔ کیونکہ دروازہ قدیم ایرانی سلطنت، ہخامنشیوں کے زمانے کی بناوٹ کا نمونہ تھا۔ میں اس سوچ میں پڑ گیا کہ ان دونوں چیزوں میں کیا تناسب ہے۔ یہ دروازہ تخت جمشید (Perspolis) کے دروازوں کی طرح بنایا گیا ہے۔

مجھے اپنا شیراز کا سفر یاد آیا۔ تخت جمشید میں داخل ہوتے ہی، ایک بورڈ پر لکھا ہوا تھا، کہ یہ دروازے ایک زمانے میں بہت خوبسورت اور عالیشان ہوا کرتے تھے۔ اس زمانے میں جب مختلف ملکوں اور قوموں کے نمائندے، ایران کے بادشاہ سے ملنے، یا ہدایا اور خراج پیش کرنے آتے، ان دروازوں سے داخل ہوتے تھے۔ اور سلطنت ایران کی قدرت، عظمت اور جلالت دیکھ کر مرعوب ہوجاتے تھے۔ وہاں دروازے سے پہلے، اس زمانے کی تمام اقوام کے نمایندوں کی تصویریں پتھر پر منقوش تھیں، ان سب کو پادشاہ کے سامنے دست بستہ اور ہدیہ پیش کرتے ہوئے دکھایا تھا۔ تاریخ کا بیان ہے کہ ایک شخص تھا، جو یہاں آیا، اور مرعوب تو نہیں ہوا، لیکن اس عظمت کو مرعوب کرکے، نظر آتش کر گیا۔ اس کا نام اسکندر اعظم بتایا گیا ہے۔

میں بھی اپنے آپ کو ایک قوم کا نمائندہ محسوس کرتے ہوئے بادشاہ ایران کے ویران محل میں داخل ہوا۔ میرے ایرانی دوست نے مجھ سے کھا۔ دیکھ رہے ہو ایران کی عظمت۔ میں نے کہا، ہم تو اس سے مرعوب نہ ہوئے، اور نہ کوئی عظمت نظر آرہی ہے، ہاں ایک بات ہے، مظلوم کے خون اور اور آہ کی قدرت صاف نمایاں ہے۔ کہ اتنی بڑی اور قدرتمند سلطنت، لمحے بھر میں جل کر راکھ ہوگئی۔ اگر بادشاہ دوسروں کو مرعوب کرنے کی جگہ، عوام کا خیال رکھتا، اور ان کی فکر کرتا، تو یہی عوام اپنی قدرت سے اسکندر جیسے فاتح کو بھی اپنے بادشاہ کے سامنے سر اٹھانے نہ دیتی۔ لیکن افسوس کہ حکمران، قدرت کے نشے میں تاریخ کو بھول جاتے ہیں۔ اور تاریخ تکرار ہو تی رہتی ہے۔

اب آپ خود ہی سوچیں کہ فیکلٹی آف ورلڈ اسٹڈیز کے لیے ایسا دروازہ کیوں منتخب کیا گیا ہے۔ کیا کسی کو مرعوب کرنا ہے؟ یا تاریخ کو دہرانے کا موقع فراہم کرنا ہے؟

خیر، ہم دانشکدہ زبان ہائے خارجی میں داخل ہوئے، اور عارف صاحب کے ساتھ ان کی کلاس میں جا بیٹھے۔ ڈاکٹر بیات لیکچر دے رہے تھے۔ موضوع، غالب کے شعری ادوار، تھا۔ لیکچر اردو میں دے رہے تھے۔ ڈاکٹر بیات صاحب نے دو یا تین برس پہلے، پنجاب یونیورسٹی سے پی ایچ ڈی کی سند حاصل کی ہے۔ روانی سے فارسی لہجے میں اردو بولتے ہیں۔ ان کی چند کتابیں اور تراجم شائع ہوچکے ہیں۔ انہوں نے ہماری عزت افزائی فرمائی اور کلاس میں بیٹھنے کی اجازت دی۔ کلاس میں ہم دونوں کے علاوہ تقریبا تیرہ طالب علم تھے۔ جن میں سے صرف دو لڑکے تھے۔

کلاس کے بعد ہم کتابخانہ دیکھنے گئے۔ یہاں کتابخانے میں داخلہ منع ہے۔ اگر کسی کو کوئی کتاب پڑھنی ہے، تو فہرست میں سے اس کا نمبر بتا کر کتاب حاصل کرسکتا ہے۔ عارف صاحب نے کتابخانہ دار سے بات کی اور انہوں نے ہمیں اندر جانے کی اجازت دے دی۔ کتابخانے میں مختلف زبانون میں کتابیں موجود ہیں۔ اردو شعبہ تقریبا اٹھارہ سال پہلے یہاں شروع ہوا ہے۔ لیکن اس کے باوجود، میرے اندازے سے کم اردو کتابیں یہاں موجود ہیں۔ لیکن کتابیں اچھی اور مفید ہیں۔

مختصر یہ کہ مجھے یہ دیکھ کر بہت خوشی ہوئی کہ ہماری زبان ایران میں بھی پڑھائی جارہی ہے۔ اور اس کے شوقین بھی یہاں موجود ہیں۔ امید ہے ہماری زبان مزید مقبول ہو اور ترقی کرے۔

فاضل

۲۷ مئی ۲۰۱۰

عشق کا بلاوا۔۔۔۔۔۲

2010-04-02T03:48:00.000+04:30

بسم اللہ الرحمن الرحیم

ڈیڑھ دو گھنٹے حرم میں کیسے گذرے، سورج کب نکلا، کچھ نہیں معلوم۔ زیارت کرکے حرم سے باہر نکلے۔ باب القبلہ کے سامنے، شارع الرسول ص میں پہنچے۔

اب آپ یہ بتائیں ، سب سے اچھا، مزیدار، اعلی، شاندار اور بہترین ناشتا کہاں کھایا ہے۔ شاید کسی بڑے ہوٹل مثلا برج العرب میں کھایا ہو، یا اٹلی میں، یا نہ جانے کہاں۔ ہاں میں نے بھی ایسی بہت سی جگھوں پر ناشتا کیا ہے، دنیا کے مختلف ملکوں میں، مختلف ہوٹلوں میں۔ لیکن اگر کوئی مجھ سے یہ سوال پوچھے تو میں کہوں گا کہ، تیس جنوری دوہزار دس کو، نجف اشرف میں، صبح آٹھ یا نو بجے، امام علی علیہ السلام کے حرم کے سامنے۔ ہاں شاید عجیب محسوس ہو، لیکن حقیقت ہے۔ نہ کوئی بہت عمدہ ریسٹورینٹ تھا، نہ کوئی بیٹھنے کی بہت اچھی جگہ تھی۔ ہمارے ایک ساتھی نے پانچ عدد صمون خریدیں، ایک پنیر کا ڈبہ لیا، اور چائے۔ بیٹھنے کی جگہ تو نہیں تھی، اس لیے فٹ پاتھ پر کھڑے ہو کر ہم نے ناشتہ کیا۔ ارے جناب کیا ناشتا تھا، پچھلی زیارت کی یاد تازہ ہو گئی، اتفاق سے اس سے پہلے بھی جب نجف آیا تھا، تو پہلے دن یہی ناشتا، تقریبا اسی جگہ کیا تھا۔ کیا لطف ہے بارگاہ علوی کی فضا میں۔ خدایا ترا لاکھ لاکھ شکر ہے کہ یہ سعادت ہمیں نصیب ہوئی۔ خدا یہ سعادت سب کو نصیب کرے ان شاء اللہ۔

ہم مزید دو دن نجف میں رہے اور منگل کو کربلا کی طرف روانہ ہوئے۔ آپ کو شاید معلوم ہو کہ امام حسین علیہ السلام کی زیارت کے لیئے سال میں جمعراتوں کے علاوہ تین دن مخصوص ہیں، عرفہ، عاشورا اور اربعین۔ الحمد للہ پہلے دو موقعوں پر تو زیارت نصیب ہو چکی تھی۔اربعین پر یہ میری پہلی زیارت تھی۔ ان ایام میں، اکثر لوگ، پیدل کربلا کی طرف جاتے ہیں۔ امام علیہ السلام کی زیارت کرنے۔ ہمارا بھی یہی ارادہ تھا، لیکن فرصت کم تھی۔ اس لیے نجف سے بیس کلومیٹر کے فاصلے تک، بسوں پر گئے۔ وہاں سے پیدل کربلا کی طرف گئے۔ پہلے تو جب ہم نے دیکھا کہ سب پیدل ہیں اور ہم سوار، بڑی شرم محسوس کی۔ اس سے زیادہ مجھے شرم اس وقت آئی۔ جب پیدل چل رہا تھا اور دوسروں کا اشتیاق اور خلوص دیکھ رہا تھا۔ لوگ نہ جانے کہاں کہاں سے پیدل آرہے تھے۔ نہ کوئی سن کی حد تھی، نہ صحت کی۔ کوئی ننگے پیر، کوئی جوتوں کے ساتھ، بعض کے تو پیر زخمی ہوگئے تھے۔ کچھ لوگ ایسے بھی تھے، جو چھڑی لےکر چل رہے تھے۔ اس عشق میں ہمارے رقیب بہت زیادہ ہیں، اور یہ رقابت نہایت شیرین ہے۔

اس سے پہلے جب چودہ سوپچیس میں ، کربلا آیا تھا۔ اسی راستے سے گذرا تھا۔ اس وقت یہ جگہ بالکل سنسان تھی، اور یہاں کوئی عمارت نہیں تھی۔ لیکن اس دفعہ، نجف سے کربلا تک، کوئی جگہ خالی نہیں تھی۔ سڑک کے داہنی طرف، مواکب اور حسینیے بنے ہوئے تھے۔ ان مواکب میں، زائروں کے لیے ہر قسم کی سہولیات فراہم کی گئیں تھیں۔ چائے، پانی، شربت، قہوہ، کافی،دودھ، کھانا، مفت ٹیلی فون، مساژ اور۔۔۔ غرض یہ کہ تقریبا ہر ضروری سہولیت میسر تھی۔ جو لوگ آرام کرنے بیٹھتے تھے، ان کے پیر دبائے جاتے تھے، مرہم پٹی کی جاتی، معالجہ کیا جاتا۔ اب اگر وہاں کا سارا حال لکھنا ہو تو بہت کچھ لکھنا ہوگا۔

تین دن اور دوراتوں کے بعد، ہم بارگاہ معشوق میں داخل ہوئے۔ کربلا کی زمین پر قدم رکھے۔ ہمارے ساتھیوں کا کیا حال تھا، جو ابھی تک کود کو روکے ہوئے تھے، ان کی آنکھوں سے بھی عشق شوق جاری ہوگئے۔ دور سے شہنشاہ وفا کی بارگاہ نظر آئی، بارگاہ الہی میں سجدہ شکر بجا لانے لگے، کہ میرے رب ترا شکر کہ اتنی بڑی سعادت جس کی نہ جانے کتنون کو تمنا ہے، ہمیں نصیب فرمائی۔ سجدہ کناں بارگاہ عشق میں داخل ہوئے۔ کربلا میں بے انتھا رش تھا، ہر طرف زوار ، ماتمی جلوس اور کھانا پکاتے لوگ نظر آتے تھے۔ چلنا مشکل تھا۔ بڑی مشکل سے اپنی ہوٹل تک پہنچے، سامان رکھا، نھائے دھوئے، نماز پڑھی، اور امام حسین ع کے حرم کی جانب گئے۔ شب اربعین تھی، زیارت اربعین کی۔ الحمد للہ بہت اچھی طرح زیارت کی۔ جب ہم کربلا پہنچے تو تھکن کے مارے نڈھال ہونے والے تھے، لیکن شوق زیار ت نے ہماری ساری تھکن دور کردی۔ سفر کی ساری سختی بھول گئے، کاش اس سے زیادہ سختی جھیلی ہوتی، اس زیارت کی ارزش اس سے کہیں زیادہ ہے۔کربلا کا ماحول بڑا عجیب ہے،میرا تو دل چاہتا ہے کہ وہیں جا کر رہوں، نہیں معلوم کیا بات ہے کربلا کی فضا میں۔ نہیں معلوم اور لوگوں کوبھی ایسا محسوس ہوتا ہے کہ نہیں، مجھے یہاں علم، عشق، آزادگی، شرافت، انسانیت، نجابت، عظمت، وفا، اسلام، فداکاری، شہادت، مختصر یہ کہ حسین ع کی بو آتی ہے۔ اگر یہ سب لوگ جو یہاں آتے ہیں، اس کو احساس کر لیں، تو میں یقین کے ساتھ کہہ سکتا ہوں کہ اسلام اور مسلمانوں کے سامنے کسی کی سر اٹھانے کی ہمت نہ رہے گی۔ لیکن کیا کیا جائے کہ ہم الفاظ و ظواہر میں مگن ہیں، اصل اور حقیقت کو بھلا بیٹھے ہیں۔ لیکن یہ بات بھی ضروری ہے کہ ظواہر بھی زندہ رکھیں جائیں، ضرور ایک دن ایک ایسی نسل ہماری آئے گی جو ظواہر سے اگے بڑھ کر، اصل اور حقیقت کو زندہ کرے گی۔ اس کی ابتدا ہمیں کو کرنا ہوگی، پہلے خود اس حقیقت کو پہچانیں۔ ضرور وہ وقت آئے گا، اور وہ قریب ہے۔

انسان کو بیدار تو ہولینے دو

ہر قوم پکارے گی ہمارے ہیں حسین

حسین ع کا پیغام ہر رنگ و نسل کے لیے ہے، یہ ایک ایسا پیغام ہے جس کی حدود انسانیت سے بھی بالا تر ہیں۔ کاش ہم اس پیغام کی عظمت کو جان سکیں اور اس پر گامزن ہونے کی کوشش کریں۔ ان شاء اللہ

ہم مزید دو دن کربلا میں رہے، روز کا معمول تھا کہ کئی بار زیارت کرنے جاتے تھے۔ حرم امام حسین ع کافی تبدیل ہوگیا ہے، دیواروں کے پتھر بدلے جارہے ہیں، صحن کو مسقف کر دیا ہے۔ حضرت عباس کے حرم میں بھی کام جاری ہے۔ بین الحرمین کو بھی چاروں طرف سے بند کردیا ہے، چند دروازے ہیں جن پر ہر آنے والے کی تلاشی لی جاتی ہے۔ حرم میں موبائل، کیمرہ، بیگ لے جانا منع ہے۔ امنیت برقرار رکھنے کے لیے یہ سب ضروری ہے۔ کربلا میں تو شدید سکیورٹی تھی، ہمارا ہوٹل حرم سے تقریبا آدھے کلومیٹر کے فاصلے پر تھا۔ ہمارے ہوٹل سے حرم تک پانچ چیک پوسٹیں تھیں، جن پر فوجی کھڑے تھے اور سب کی تلاشی لیتے تھے، نجف میں بھی کچھ ایسا ہی انتظام تھا۔

یہ تین دن کربلا میں بہت جلدی گذر گئے۔ آخری دن حرم امام حسین ع میں ہمیں ناشتا دیا گیا۔ اربعین کے دو دن بعد کربلاسے نکلنا تھا، نجف اور پھر واپس۔ بہت کوشش کی کہ کسی صورت زیادہ رک جائیں، لیکن نہ ہوسکا۔ آخری زیارت بہت مشکل تھی، کربلا سے جانے کا تصور بھی پریشان کن تھا۔ حرم امام حسین ع گیا، عرض کیا، کہ جا تو رہا ہوں لیکن دل نہیں مان رہا، جسم کو جانا پڑے گا، مگر دل یہاں مہمان ہے۔

اتوار کو کربلا سے نکلنے لگے، ہمارے ساتھ آسمان بھی رو رہا تھا۔ کسی کا جانے کو دل نہیں چاہ رہا تھا، مگر کیا کرتے۔ ہمارا حال کیا تھا، یہ سوچیں، کیا حال ہوگا اس مچھلی کا جس کو آپ پانی سے الگ کر رہے ہوں ۔۔۔۔۔ ارے ایسا نہیں کیجیے گا ۔۔۔۔۔ مر جائے گی ۔۔۔۔۔

والحمد للہ العلی

سترہ ربیع الثانی ۱۴۳۱ بعد از ہجرت نبوی ص

ایک قطعہ

2010-03-27T14:48:00.000+04:30

بسم اللہ الرحمن الرحیم

آگئے ہم کربلا میں دل کو اپنے چھوڑ کر
مالک و مقصود سے پھر جاں کا رشتہ جوڑ کر
کی دعا ہو موت اپنی مثل ابن مرتضی
چھوڑ دیں دنیا مگر ظالم کی گردن توڑ کر

فاضل, آی فون

سفر کے چند لمحات

2010-03-26T09:10:00.004+04:30

بسم اللہ الرحمن الرحیم

کل اپنے سفر کی تحریری سرگذشت لکھی تھی، سوچا کہ آج چند تصویری یادیں بھی آپ کو دکھادوں۔ فارسی کی ایک کھاوت ہے، شنیدن کے بود مانند دیدن، لیکن میں کہوں گا کہ، دیدن کے بود مانند بودن۔ کیونکہ ایک تصویر صرف ایک لمحے کو دکھا سکتی ہیں، جبکہ وہاں ہر لمحہ، صدیوں پر بھاری تھا۔ تو چند لمحات اس سفر کے آپ بھی دیکھ لیں۔

اس سفر میں یہ ہماری حرم حیدر کرار علیہ السلام کی پہلی زیارت تھی۔ گذشتہ کئی دنوں کی تھکن، اس ایک منظر نے ختم کردی۔

خورشید سر شام کہاں جاتا ہے

روشن ہے دبیر پر جہاں جاتا ہے

مغرب ہی کی جانب ہے مزار حیدر

یہ شمع جلانے کو وہاں جاتا ہے

مسجد سہلہ، کوفہ میں، مسجد کوفہ کے نزدیک یہ مسجد ہے۔ یہاں کئی انبیاء کرام اور تمام ائمہ معصومین علیہم اسلام نے نماز پڑھی ہے۔ یہ مقام امام جعفر صادق علیہ السلام ہے۔ شاید یہاں امام جعفر صادق علیہ السلام نے نماز پڑھی ہے۔ ہم نے بھی یہاں تمام مقامات پر نمازیں پڑھیں۔

یہ مسجد کوفہ کا اصلی دروازہ ہے۔ یہ بہت پرانی اور اہم مسجد ہے۔ کہا جاتا ہے کہ طوفان نوح یہاں سے شروع ہوا تھا۔ امیرالمومنین امام علی علیہ السلام کو اسی مسجد میں نماز کے دوران ضربت لگائی گئی، جس کے اثر میں آپ شہید ہو گئے۔

یہ وہی محراب ہے، جہاں امام علی علیہ السلام کے سر مبارک پر ضرب لگائی گئی۔ ویسے اس زمانے میں اس کی حالت ایسی نہیں تھی۔ اب اس کو خوبصورت بنادیا گیا ہے۔ محراب کے بیچ میں، بہت خوبصورتی سے، امام کا مشہور جملہ "فزت و رب الکعبہ" لکھا ہے جو آپ ع نے، ضرب لگنے کے وقت فرمایا تھا۔

پاکستان، ہندوستان، سری لنکا، مسجد کوفہ کے صحن میں۔ پیچھے جناب مسلم بن عقیل کے مزار کا گنبد نظر آرہا ہے۔ بیچ میں، میں ہوں۔ دائیں طرف سری لنکا سے، محمد اجود۔ اور بائیں جانب، ہندوستان سے سید محمد جواد جوادی۔

کربلا کے رستے میں، میں نے عربی لباس پہنا تھا۔ آپ بتائیں کتنا عرب لگ رہا ہوں؟ اس تصویر میں، بائیں طرف سے، ہمارے کاروان سالار شیخ محمد فاضل الزبیدی، محمد الفتلاوی،عمار سبیل بنگلادیش سے، علی فاضل الکرباسی، میں، سید محمد مہدی نوری، اور آخر میں ایک زائر جس کا نام نہیں معلوم۔ کافی غور و غوض کے بعد، اس تصویر میں ایک اور صاحب کا انکشاف ہوا جن کا ایک ہاتھ اور پیر نظر آرہے ہیں۔ جی شیخ فاضل سے محو گفتگو جناب سید محمد جواد جوادی صاحب، ان کے برابر میں بیٹھے ہیں۔

ہمارے ساتھ تین کیمرے تھے، جن کی سب تصویریں ملا کر، شاید ڈھائی تین ہزار ہوں۔ ان میں سے چند یہاں آپ نے دیکھ لیں۔ مزید تصویریں بھی اپلوڈ کی ہیں، جو ان دو ربطوں پر دیکھی جا سکتی ہیں:

فوٹوبکٹ فیس بک

عشق کا بلاوا .....

2010-03-24T13:44:00.002+04:30

بسم اللہ الرحمن الرحیم

نہیں معلوم اس تحریر کو پڑھنے والے کس مذہب، مسلک، یا دین کے پابند ہیں۔ لیکن اتنا ضرور ہے سب قارئین کا میری فکر و نظر سے متفق ہونا لازمی نہیں۔ آزادی فکر کا مطلب ہی یہی ہے۔ فبشر عبادی الذین یستمعون القول و یتبعون احسنہ۔ خیر میں اس تحریر میں کوئی ایسی بات نہیں کرنے والاہوں جس میں اختلاف نظر ہو، یا بحث مباحثہ ہو، لیکن یہ بات اس لیے کہہ رہا ہوں، کہ اس تحریر میں جو باتیں آئیں گی شاید بعض لوگوں کو اس سے اختلاف ہو۔ ان حضرات سے پیشگی معذرت چاہتا ہوں۔ ہمارے سامنے جب کبھی کربلا اور نجف کا ذکر ہوتا ہے، دل کی دھڑکن تیز ہوجاتی ہے، روح جانب معشوق سفر کرجاتی ہے، آنکھوں کو اگر روکا نہ جائے تو آنسووں سے بھیگ جاتی ہیں۔ نہیں معلوم آپ نے کبھی عشق کیا ہے کہ نہیں، ہمارا عشق تو ایسا ہے، کسی حسینہ کی جگہ ہم شاہ کربلا کے عشق میں گرفتار ہیں۔جب معشوق کا ذکر ہو تو ہمارا حال کیا ہوتا ہے، یہ تحریر کرنے سے قاصر ہوں۔بس اتنا سن لیں،

تمنائے نجف قاتل ہے میری

مجھے عشق و جنون کربلا ہے

ہمارا یہ سفر کہاں سے شروع ہوا؟ ہوا یہ کہ ایک دن ہاسٹل میں بیٹھے چائے پی رہے تھے، ایک ایسی بات ہوئی جو ہمارے دلوں کے زخموں پر نمک چھڑک گئی۔ کربلا جانا ہے۔ اس وقت تو یہ بات گذر گئی اور بھلا دی گئی۔ لیکن دل کا کیا حال تھا، عاشق لوگ ہی جان سکتے ہیں۔ دو ہفتے بعد طے پایا ۲۵۰ سٹوڈنٹس کو کربلا لے جانا ہے۔ اس درمیان کیا ہوا، کافی لمبی کہانی ہے، آگے بڑھتا ہوں۔

۱۰ جنوری۲۰۱۰، یونیورسٹی کے مرکزی ہال میں، ایک میز پر چند لسٹیں رکھی ہیں، دو افراد بیٹھے ہیں، آنے والوں کے نام لکھ رہے ہیں۔ میز کی دوسری طرف ہجوم ہے۔ ۷۰۰ افراد نام لکھواچکے ہیں۔ میں بظاہر پرسکون کھڑا یہ منظر دیکھ رہا ہوں۔ لیکن دل میں محشر بپا ہے۔ بڑی مشکل سے بات کی جارہی ہے۔ جب یہ خیال ستاتا ہے کہ یہ سب لوگ چودہ دن بعد کربلا میں ہوں گے، اور میں نہیں جاسکتا، رونے کو دل کرتا ہے۔ آپ بھی جارہے ہیں؟ ایک صاحب نے پوچھا۔ میرے دل کا کیا حال ہوا، میں ہی جانتا ہوں۔ کیا جواب دیتا، نہیں کہنے کو دل نہیں مانتا، ہاں کہنے کو حالات روکتے ہیں۔ دل ہی دل میں، معشوق سے کہا، بتاو تمھے کیا منظور ہے؟ کیا کہہ دوں کہ دل تو چاہتا ہے مگر، حضرت دل کے مالک بلا نہیں رہے۔ فورا جواب مل گیا، آجاو۔ بس پھر کیا، جو کام ناممکن تھا، ایک ہفتے میں ممکن ہوگیا۔ جس کو بھی بتایا کہ جا رہا ہوں، مان نہیں رہا۔ ایک دوست نے تو کہہ دیا کہ یار مزاق چھوڑو سچ بتاو۔ سچ کیا بتاتا، خود بھی یقین نہیں آرہا تھا کہ چند دنوں میں، بارگاہ عشق میں ہوں گا۔ تفصیل لکھنے سے قاصر ہوں کہ اس میں چند پردہ نشینوں کے نام ہیں، اور کسی کو رسوا کرنے، مسلک عشق نہیں۔

خیر بڑی مشکلات جھیلیں، لیکن آخر وہ دن آہی گیا۔ جب ۶۰۰ طالب علم، کربلا کے لیے روانہ ہونے لگے۔ ہم بھی ایک خادم کی حیثیت سے ساتھ تھے۔ حقیقت تو یہ ہے ابھی تک یقین نہیں آرہا تھا کہ اتنی بڑی سعادت، اتنی آسانی سے نصیب ہوگئی۔ ۸ فروری کو رات نو بجے ہم سرحد کی جانب چل پڑے۔ خوشی ہماری، نہ پوچھیے، کہ ابھی بھی اس کی یاد سے ہم پھولوں نہیں سماتے۔

لیکن انتظار کرنا بہت مشکل ہوتا ہے۔ ایسا لگتا ہے گھڑی آگے بڑھنے کی جگہ پیچھے جارہی ہے۔ کیا ہوتا اگر ہمیں بھی خدا نے پر دیے ہوتے۔ لیکن اس انتظار میں جو لذت ہے، اسے کسی چیز سے نہیں بدلا جاسکتا، اور اس کے بعد جب انتظار کی گھڑیاں ختم ہوتی ہیں، تو آدمی تمنا کرتا ہے، کہ کاش یہ گھڑیاں اور طویل ہوتیں۔ ہاں تو ہم اس انتظار میں تھے کہ کب یہ سرحدیں، سڑکیں، دیواریں ختم ہوں گی اور ہم اپنے معشوق کے در پہ پہنچے گے۔ صبح پانچ بجے سرحد پہنچے، اور آٹھ بجے تک ہمارے ساتھی بھی آگئے، اب سرحد پر ہمیں روک دیا گیا۔ کیوں؟ اس لیے کہ ۔۔۔۔۔ خیر رہنے دیں۔ یہاں بھی چند پردہ نشین ہیں، پردہ نشین کیا، وہ تو ۔۔۔۔۔ چلیں یہ بھی رہنے دیں، سفر کی مٹھاس کو کڑواہٹ سے خراب نہیں کرنا چاہیے۔

ویسے تو فاصلہ شاید بمشکل پانچ یا دس کلو میٹر کا تھا۔ لیکن ہمیں یہ فاصلہ طے کرنے میں۱۲ گھنٹے لگ گئے، یعنی تقریبا شام پانچ بجے، امیگریشن کے مراحل سے گذر کر مملک عراق میں قدم رکھے اور سکون کی سانس لی۔

رستے میں امریکا سے بھی ہو لیے۔ وہ ایسے کہ جب عراقی حدود میں داخل ہوئے تو پہلے امریکی فوجیوں نے ہم سب کے پاسپورٹ دیکھے، انگلیوں کے نشان لیے۔ پھر عراقی سرحدی پولیس نے ہمارے پاسپورٹوں پر داخلے کی مہر لگائی۔ ایک مرحلہ طے ہو گیا۔ نماز شکر، میں خدا کا شکر ادا کیا، اور باقی سفر خیریت سے گذرنے کی دعا کی۔ دعا تو ہم نے صرف وہاں تک پہنچنے کی کی تھی، کیونکہ وہاں پہنچ کر واپسی کی تمنا کم از کم مجھے نہیں تھی۔ ہمارا حال کچھ ایسا ہے،

اے ابرِ کرم ذرا تھم کے برس، اتنا نہ برس کہ وہ آ نہ سکیں

جب آجائیں تو جم کے برس، پھر اتنا برس کہ وہ جا نہ سکیں

بس فرق اتنا ہے کہ اس طرح کی دعا، کسی کے آنے کے لیے نہیں، ہم جانے کے لیے کر رہے تھے۔ سرحدی شہر، کوت، سے ہم کوئی آٹھ بجے روانہ ہوئے جانب نجف اشرف۔ نجف میں ہمارے دادا، بلکہ بابا، مولا، مقتدا، امیرالمومنین امام علی علیہ السلام کا مرقد منور ہے۔ جس کے لیے ہم آئے تھے۔ یہاں سے بھی گیارہ یا بارہ گھنٹوں کا سفر طے کرکے، اذان فجر سے کچھ دیر پہلے نجف میں داخل ہوئے۔ گرچہ گذشتہ دو تین دنوں سے سونا تو کیا، ڈھنگ سے آرام بھی نہیں کر پائے تھے۔ تھکن کا یہ حال کہ چلا نہیں جا رہا۔ لیکن جب اپنے مولا کے مزار کا گنبد دیکھا، ساری تھکن اتر گئی۔ سامان اپنے کمرے میں رکھا۔ نماز تو اب حرم میں ہی پڑھیں گے۔ باہر نکلنے لگے تو ہمیں روک دیا گیا۔ آرام کرلیں پھر حرم جائیے گا۔ کیا بتاوں، بس ایسا سمجھیں کہ پیاس سے ہلکان ہورہے ہوں، اور کوئی سامنے بہتی میٹھے پانی کی نہر سے روک دے، کہ تھوڑی دیر میں ہم خود آپ کو اسی نہر کا پانی پلا دیں گے۔ بڑی مشکل سے، بلکہ لڑ کے باہر نکلے اور مولا کی ضریح کے سامنے فجر کی نماز ادا کی۔ ارے جناب ہمارا حال نہ پوچھیے کہ نہ قلم میں لکھنے کی سکت ہے، اور نہ ہم لکھ سکتے ہیں۔

حال شب وصال بیاں کر نہ پاو گے

فاضل قلم کو روک دے دل اپنا تھام لے

جاری ہے۔۔۔۔۔

حسین علیہ السلام وارث انبیاء علیہم السلام

2010-01-07T00:19:00.002+03:30

بسم اللہ الرحمن الرحیم

ہر خاندان کی ایک میراث ہوتی ہے۔ اور اس کی حفاظت اس خاندان کے تمام افراد کا فریضہ ہوتا ہے۔ یہ خاندان جتنا بڑا اور عظیم ہوتا ہے، یہ میراث بھی اتنی ہی خاص اور ارزشمند ہوتی ہے۔ خاندان کے افراد خاص تدابیر کے ذریعے اس کی حفاظت کرتے ہیں، اغیار اور نااہلوں کی پہنچ سے اسے دور رکھتے ہیں۔ بعض اوقات تو حفاظت کے لیے جان بھی دینے سے پرہیز نہیں کیا جاتا۔ لیکن یہ سب اس وقت ہوتا ہے کہ جب خاندان کے افراد اس میراث کو جانتے ہوں، اس کی قدر و قیمت سے واقف ہوں، اور اس سے بڑھ کر یہ کہ ان میں احساس اور ذمہ داری ہو۔ تب کہیں جاکے اس کی کماحقہ حفاظت ہوتی ہے اور آئندہ نسلوں تک پہنچتی ہے۔ ہر نسل یہ امانت آنے والی نسل کو سونپتی ہے، قدر و قیمت سے آگاہ کرتی ہے، اور امانتداری و حفاظت کا حلف لیتی ہے۔ اسی طرح نسلوں اور صدیوں تک یہ میراث محفوظ رہتی ہے۔ وقت کے گذرنے کے ساتھ جب اغیار کو اس کی ارزش کا اندازہ ہوتا ہے، تو اہل خاندان کے لیے حفاظت کا عمل مشکل اور مشکل تر ہوتاجاتا ہے، کیونکہ وہ اس میراث کو چہیننے یا ضائع کرنے کے لیے ہر حربہ استعمال کرتے ہیں۔ اسی لیے ہر نسل کی ذمہ داری بڑھتی جاتی ہے۔

خیر یہ تو ایک حقیقت تھی۔ اب ذرا ایک اور تاریخی حقیقت کی جانب متوجہ ہوں۔

ایک بہت بڑا اور عظیم خاندان تاریخ کے ساتھ چلا آرہا ہے۔ یا بہتر الفاظ میں، تاریخ اس کے ساتھ چلی آرہی ہے۔ جب انسان کی تاریخ پر نظر ڈالتے ہیں۔ یہ تاریخ جناب آدم علیہ السلام سے شروع ہوتی ہے۔ اور وہ ہی اس عظیم خاندان کے جد ہیں۔ ان کو خدا نے ایک امانت سونپی۔ ایک نہایت عظیم امانت سونپی۔ ایسی امانت کہ جس کو کائنات میں انسان کے علاوہ کوئی برداشت نہ کرسکا۔ لیکن انسان نے اپنی عظمت اور قدرت کا مظاہرہ کیا اور بےشمار سختیوں کے باوجود اس امانت کو خدا سے لے لیا، اور اس کی حفاظت کا حلف اٹھایا۔ یہ امانت سب سے پہلے آدم و حوّا علیہم السلام کو سونپ دی گئے۔ اس شجاعت اور ہمت کے سبب ان کو خلافت الہی کا مقام دیا گیا۔ اور کائنات کو ان کا تابع کردیا گیا۔

خیر یہ امانت میراث کے طور پر اس عظیم خاندان میں محفوظ رہی۔ہر نسل کے بزرگ نے اس کو اگلی نسل کے حوالے کیا۔ آدم ع نے شیث ع کے حوالے کیا، اور اسی طرح سلسلہ انبیاء میں یہ امانت چلتی رہی اور ان عظیم ہستیوں نے جان و مال کا لحاظ کیے بغیر اس کی حفاظت میں کوئی کسر نہ چھوڑی۔ یہ میراث نسلوں میں منتقل ہوتی رہی۔ نوح ع، ابراہیم ع، اسماعیل ع، عیسی ع اور آخر میں ہمارے نبی عظیم حضرت محمد مصطفی صلی اللہ علیہ و آلہ وسلم اس امانت کے حامل اور حافظ رہے۔ ویسے حاملوں اور حافظوں کی تعداد بہت زیادہ ہے لیکن یہاں سب کا ذکر ضروری نہیں۔ جب نبی کریم ص کے ہاتھ یہ امانت سونپی گئی۔ اس کی حفاظت بہت مشکل ہوگئی تھی کیونکہ آپ ص سب سے آخری نبی ہونے کے ساتھ، سب سے عظیم بھی تھے۔ آپ کے شانوں پر نہ صرف اس امانت کا وزن تھا بلکہ اس کے ساتھ تمام گذشتہ انبیاء و رسل کی خدمات، زحمات اور قربانیوں کا بوجھ بھی تھا۔ اس سے بڑھ کر یہ بات بھی تھی کہ اس خاندان انسان کے کچھ افراد اتنا اپنے خاندانی اصول سے دور ہوگئے تھے کہ اب اس خاندان کے لحاظ سے ان کا شمار غیروں میں ہوتا تھا اور وہ اس میراث عظیم کی تباہی کے در پئے تھے۔ چنانچہ آپ ص نے بڑی مشکل اور مشقت کے ساتھ اس رسالت کو پورا کیا۔ اس مشکل کام میں اپنے خاندان کو بھی ساتھ لیا۔ اور ان کو بھی عظیم قربانیوں کے لیے تیار کیا۔

اس میراث کے ساتھ کیا سلوک کیا گیا۔ آپ ص کے ماننے والوں نے کیا کیا۔ بہت لمبی داستان ہے۔ یہاں یہ بیان کرنا مقصود نہیں۔

اصل بات جو کرنا چاہتا ہوں وہ یہ ہے۔

یہ میراث کیا ہے۔ اس کا جواب آپ خود ہی جان گئے ہوں گے۔ لیکن اس کی اہمیت واضح کرنے کے لیے یہ بیان کرنا ضروری ہے۔ جیسا کہ عرض کرچکا ہوں کہ میراث کی ارزش جاننے کے لیے۔ اس میراث کے ورثا کا سلوک دیکھنا ہوگا۔ یعنی ورثا اس کی حفاظت کے لیے کس حد تک جانفشانی کرتے ہیں۔ اس کا ایک نمونہ خاطر میں لائیے۔

یہ میراث سن51ہجری میں حضرت امام حسین علیہ السلام کو سونپی گئی۔ یہ دور وہ ہے کہ امت مسلمہ اپنے نبی ص کی میراث سے بہت دور جاچکی ہے۔ اس میراث کی حفاظت کو بھول چکی ہے۔ اور ایسے لوگ وراثت کے مدعی ہیں جن کے بارے میں امام حسین علیہ السلام فرماتے ہیں کہ "وہ ایک فاجر و فاسق شخص ہے۔ میں اس کی بیعت ہرگز نہیں کروں گا۔"

اس وقت اصلی وارث کی نشاندہی ضروری ہے۔ چنانچہ اس میراث عظیم کا وارث حقیقی اپنے خاندان کے ساتھ میراث انبیاء کی حفاظت کو نکلتا ہے۔ حسین علیہ السلام اپنی تمام دولت، وہ بھائی ہوں، بہنیں ہوں، اولاد ہوں، غلام ہوں، دوست ہوں، یار ہوں، کہ پیسے ہوں۔ سب کو جمع کرتے ہیں۔ اور منزل معہود کی طرف روانہ ہوتے ہیں۔ رستے میں بار بار یہ اعلان کرتے ہیں کہ میں حصول حکوت کے لیے نہیں جارہا۔ دولت یا سلطنت حاصل کرنے نہیں جارہا۔ میں شہادت کا رتبہ پانے جارہا ہوں۔ جہاں کوئی لشکر آپ سے ملنے آیا، اعلان کردیا کہ اگر دولت کی خواہش ہے تو میں ویسے ہی تمہاری جیبیں بھر دیتا ہوں۔ لیکن میرے ساتھ نہ آو۔ کیونکہ حسین ع موت سے ملنے جارہا ہے۔

کربلا میں امام علیہ السلام کئی مقاصد سے آئے ہیں۔ ان میں سے ایک یہ ہے کہ تمام عالم کو یہ دکھا دیں کہ، میراث انبیاء کا وارث حقیقی کون ہے۔ اور مسلمانوں کو اس کی ارزش سے آگاہ کردیں۔ کہ مسلمانو، دیکھو کہ حسین نے اپنا سب کچھ اس پر قربان کردیا۔ بھائی، بھنیں، اولاد، دوست، عزیز، دولت، سب کچھ اس میراث کی حفاظت کے لیے قربان کردیا۔ تو اسی سے اندازہ کریں کہ اس میراث کی کیا قیمت ہے۔ جس کے لیے امام حسین علیہ السلام جیسی شخصیت نے اتنی عظیم قربانی دی۔ صرف یہ نہیں اپنے بعد، اپنی تحریک کا علم، اپنی بہن جناب زینب سلام اللہ علیہا کے حوالے کیا۔ اور جناب زینب س نے کتنی مشقتیں جھیلیں، ان کے بیان سے یہ قلم قاصر ہے۔

امام حسین علیہ السلام نے تمام مسلمانوں پر، بلکہ تمام انسانوں پر حجت تمام کردی۔ رہتی دنیا تک اب کوئی یہ نہیں کہہ سکتا کہ ہم کو اس میراث کی قدر و قیمت معلوم نہیں۔ ہم اس کو نہیں جانتے۔ یہ امام حسین علیہ السلام کی تحریک کا ایک چھوٹا سا اثر ہے۔ اس کے اثرات ایک دو یا تین صفحات میں بیان نہیں کیے جاسکتے۔

اب جو بات ہمارے لیے سب سے زیادہ قابل غور ہے وہ یہ ہے کہ، یہ میراث اب ہمارے سامنے ہے۔ ہم اس کے ساتھ کیا سلوک کررہے ہیں؟ کیا ہم اسلام پر عمل پیرا ہیں؟ کیا اگر اسلام کو دوبارہ کسی عظیم قربانی کی ضرورت ہو تو ہم امام حسین ع کی طرح اپنا سب کچھ لٹا سکتے ہیں؟ کیا ہم اپنی جان دینے کو تیار ہیں؟ کیا ہم اس میراث کی حفاظت کررہے ہیں، یا ابھی بھی کسی حسین علیہ السلام کے منتظر ہیں کہ آ کر ہمیں اس میراث کی قدر و قیمت بتائے؟

اگر مسلمانوں میں شعور اجاگر ہوجائے، اور مسلمان اس راہ پر گامزن ہو جائیں، تو یہ دنیا میں عزیز ہوجائیں گے، کوئی باطل قدرت ہمارے سامنے سر نہ اٹھا پائے گی۔ یہ تو دنیا کی بات ہے۔ آخرت میں جو ہوگا وہ تصور سے بڑھ کر ہے۔

خدایا! وارث انبیاء، امام حسین علیہ السلام اور شہدائے کربلا کے صدقے!

مسلمانوں کو شعور، آگہی اور ہمت دے۔

کربلا کے مقصد کو جاننے کی قدرت دے۔

اسلام حقیقی پر گامزن ہونے کی توفیق و جرات دے۔

آمین

سید محمد نقوی فاضل

بارہ محرم الحرام

چودہ سو اکتیس

اے دین مصطفی ہو مبارک تجھے یہ دن

2009-12-07T21:17:00.002+03:30

بسم اللہ الرحمن الرحیم

ویسے تو آج ۱۹ ذی الحجۃ ہوگئی ہے، اور عید قربان اور عید غدیر دونوں ہی گذر گئی ہیں۔ لیکن چونکہ مصروفیت کے سبب ان دو دنوں کے حوالے سے کچھ لکھ نہیں پایا تو سوچا آج دونوں کو ایک کرکے، کم از کم مبارک باد ہی عرض کردوں۔

تمام مسلمین کو میری طرف سے عید قربان اور عید غدیر مبارک ہوں۔

اور بارگاہ الہی میں دعا ہے کہ تمام حاجیوں کا حج قبول فرمائے۔

اور ملت مسلمہ کو سربلندی عنایت فرمائے۔

آمین

عید غدیر کے حوالے سے چند شعر لکھے تھے جو پیش کررہا ہوں امید ہے کہ بارگاہ الہی میں قبول ہوں۔ آمین

جبریل تم کو آج یہ کیسا سرور ہے؟

خم کی زمیں بتا کہ تجھے کیوں غرور ہے؟

سمجھا ہوں میں کہ آج الگ سا نزول ہے

اے دشمنِ نبی ترا ہنسنا فضول ہے

رشکِ مکینِ عرش ہے منبر سجا ہوا

بہر ادب ہے سارا زمانہ جھکا ہوا

مہمان آج تیرے نبیّ و وصی ہیں خُم

عظمت میں تیری سارا زمانہ ہے آج گُم

اے دین مصطفی ہو مبارک تجھے یہ دن

اکمال ہورہا ہے تو یہ عید کا ہے دن

آتی ہے ہر طرف نِدائے علی ولی

اعلان کررہے ہیں نبی ہے علی ولی

عید غدیر ۱۴۳۰

کوئی خاص خبر سناو۔۔۔

2009-10-26T04:59:00.002+03:30

بسم اللہ الرحمن الرحیم

چند دن پہلے کی بات ہے، دوستوں کے ساتھ بیٹھا تھا۔ باتیں ہورہی تھیں، میں نے ایک خبر سنائی۔ پشاور میں آج صبح دھماکہ ہوا ہے۔ ایک پشاور کے دوست تھے ان سے پوچھا، آپ نے گھر فون کرکے خیریت معلوم کی یا نہیں؟

میرا یہ کہنا تھا کہ ہمارے ایک عزیز دوست نے ارشاد فرمایا: یہ معمول کی بات ہے۔ جس دن پاکستان میں دھماکہ نہ ہو یا کوئی مارا نہ جائے اس دن تعجب ہوتا ہے کہ کچھ کیوں نہیں ہوا؟ کوئی خاص خبر ہو تو سناو۔

گرچہ ان کا تعلق پاکستان سے نہ تھا، لیکن مجھ سے رہا نہ گیا، کچھ بولنے والا تھا، کہ ہمارے پاکستانی ساتھیوں نے کسر پوری کردی۔ ان کی ہاں میں ہاں ملا کر، تایید کردی۔ میں تو حیران رہ گیا۔ میرے لیے تو ایک انسان کے قتل سے بڑھ کر کوئی خبر، خاص نہیں ہوتی، چہ جائی کہ چند انسان ہوں۔ اب میں کیا کہتا؟ جب اپنوں کو بھی کوئی غم نہ ہو۔

میں یہاں کوئی سیاسی بات نہیں کہنا چاہتا۔ اور نہ ہی کوئی راہ حل یا اس قسم کی کوئی بات کرنا چاہتا ہوں، کیونکہ میری یہ حیثیت نہیں۔ بس ایک بات جو دل پر بوجھ بنی تھی لکھنا چاہتا ہوں۔

یہ حال دیکھ کر مجھے بہت افسوس ہوا کہ یہ ہمارے پڑھے لکھوں کا حال ہے۔ جو خود کو بڑا سیاستدان سمجھتے ہیں، اگر کہیں کوئی سیاسی بحث ہو تو ایسی تحلیلیں پیش کرتے ہیں جیسے ان پر وحی اتری ہو، نعوذ باللہ۔ لیکن اپنے ہم وطن بھائیوں کے قتل پر ذرہ برابر جو افسوس ہوا ہو۔ یہ اس وجہ سے ہے کہ ہمارے لیے لوگوں کا قتل روز کا معمول بن گیا ہے۔ ہم نے خود کو اس کا عادی کردیا ہے۔ نتیجہ یہ ہوا کہ لوگوں میں احساس مرگیا۔ اب کسی کو بتاو کہ دس آدمی فلاں دھماکے میں مارے گئے، جوابا کہا جائے گا، "بس، دس آدمی"! جیسے متاثر ہونے کے لیے کم از کم ہزار ڈیڑھ ہزار کی ضرورت ہو۔

یہی ہمارا دشمن چاہتا ہے، کہ ہم اس کے عادی ہوجائیں، اور ہمارے اندر انسانیت مرجائے۔ آپس میں ہمدردی ختم ہوجائے۔ ہر کسی کو اپنی جانِ عزیز کی فکر ہو۔

اب حال یہ ہے، اگر دھماکے یا قتل کی خبر سنائی جائے، سامنے والا کہے گا، کوئی بات نہیں میرے گھر پہ تو نہیں ہوا نا۔ خدا کرے یہاں نہ ہو۔ یا اگر بہت زیادہ درد رکھتا ہو تو پوچھے گا، سنی علاقے میں ہوا یا شیعہ علاقے میں۔ جواب سن کر اپنے مسلک کے حساب سے تاسف یا خوشی کا اظہار کرے گا۔ شہید کا لقب دے گا یا مردہ کہہ کر گذر جائے گا۔ اور زندگی جاریست، جیسے کچھ ہوا ہی نہیں۔ خدا نخواستہ مقتول مسلامن نہ ہو تو اس کی خیر نہیں، ہمدردی تو دور کی بات ہے، قاتل کی مدح سراءی ہوگی، کہ ایک غیر مسلمان کو مارا، بہت خوب۔ کیا انسانی جان کی یہی حیثیت رہ گئی ہے۔ قرآن میں خدا نے انسانی جان کی کتنی اہمیت بیان کی ہے، بگغیر دین و مذہب کی تفریق کے۔ اب اسی قرآن کے [نام کے] پیرو کار، انسانوں کے قتل پر خاموش ہیں۔

ایسا کیوں ہے؟ کب ہمیں احساس ہوگا کہ ہمارے ساتھ کیا چال چلی جارہی ہے؟ بہت دیر ہوچکی ہے یہ سب سمجھنے اور کچھ کرنے کے لیے، مزید دیر نہ ہونے دیں، کچھ تو کریں ۔۔۔

موت کی آغوش میں جب تھک کے سوجاتی ہے ماں ۔۔۔۔

2009-10-13T05:10:00.002+03:30

بسم اللہ الرحمن الرحیم

انا للہ وانا الیہ راجعون

موت کی آغوش میں جب تھک کے سوجاتی ہے ماں

تب کہیں جاکے رضا تھوڑا سکوں پاتی ہے ماں

میرے دوست اور بھائی کی ماں ہمیں داغ مفارقت دے گئیں، یہ خبر مجھے اس طرح ملی،

پچھلی عید قربان سے، قربانی کا گوشت فریزر میں رکھا تھا، تا کہ جب میں جاوں تو ۔۔۔

یہ جملہ پورا نہ کرسکا ، کیونکہ آنکھوں سے آنسو جاری ہوچکے تھے، بولنا مشکل تھا۔ میں گیا تھا بھلانے کے لیے، لیکن میرے اپنے آنسو رواں تھے۔ کیسے ڈھارس دیتا۔ میں یہ غم سہہ نہیں پارہا تھا، نہ جانے میرے دوست کا کیا حال ہوگا۔۔۔

چپ رہا ، اس سوچ میں کہ غربت، اور اتنا بڑا غم، ایک ہفتے سے جانے کی تیاری کررہا تھا کہ آخری بار ملاقات ہوجائے، لیکن خدا کو منظور نہ تھا۔ گرچہ میں دل بھلانے کے فرائض پورے ن کرسکا لیکن خدا کا احسان ہے کہ ابھی بھی لوگوں کو یہ احساس ہے کہ جب کسی کے ہاں موت ہوتی ہے تو تمام مسائل چھوڑ کر آجاتے ہیں، تسلیت دینے۔ چنانچہ جب دوست کو گھر پہنچایا، تھوڑی دیر میں تمام احباب آگئے، اور میں اکیلا ایک کونے میں سوچنے لگا۔ کہ ہمارے پاس کچھ ایسے خزانے ہوتے ہیں کہ جب تک سامنے ہوتے ہیں تو ان کو نظر انداز کرتے رہتے ہیں۔ لیکن جب نظروں سے اوجھل ہوجاتے ہیں تب ہمیں ان کی قدر ہوتی ہے۔

ماں ان میں سب سے زیادہ قابل ذکر ہے۔ اکثر ہم اس عظیم ہستی کو بھول جاتے ہیں، شاید اس کی وجہ یہ ہو کہ وہ ہماری خاطر خود کو بھلادیتی ہے، اور ہم بھی بھول جاتے ہیں۔ لیکن جس دن یہ سہارا جس پر پورا زور دے کر کھڑے ہیں، ہٹ جاتا ہے، تب ہمیں خیال آتا ہے کہ ہم کو یہاں کس نے پہنچایا۔ میں تو وہ دن تصور بھی نہیں کرسکتا کہ خدا نخواستہ ۔۔۔۔

میری اللہ سے دعا ہے، کہ میری امّی جان کو صحت، سلامتی اور طول عمر دے۔ بلکہ تمام ماوں کو سلامتی اور طول عمر دے۔

اور

آپ سب سے درخواست ہے کہ میرے دوست اور بھائی حسین الفواد کی والدہ مرحومہ، میری دادی ، نانی اور تمام ماوں کے لیے سورہ فاتحہ کی تلاوت، اور مغفرت کی دعا فرمائیں۔

جو مائیں زندہ ہیں، ان کی طول عمر اور سلامتی کی دعا کریں۔

اور اس عظیم ہستی کی قدر کریں، کہیں دیر نہ ہوجائے ۔۔۔۔۔۔۔۔۔۔۔

جناب رضا سرسوی صاحب کی نظم، ماں،یہاں پیش کررہا ہوں، کہ میرے پاس اس ہستی کے لیے الفاظ نہیں ۔۔۔

موت کی آغوش میں جب تھک کے سوجاتی ہے ماں
تب کہیں جاکر رضا تھوڑا سکوں پاتی ہے ماں

موت کی آغوش میں بھی کب سکوں پاتی ہے ماں
جب پریشانی میں ہوں بچے تڑپ جاتی ہے ماں

جاتے جاتے پھر گلے بچے سے ملنے کے لئے
توڑ کر بند کفن باہوں کو پھیلاتی ہے ماں

روح کے رشتوں کی یہ گھرائیاں تو دیکھئے
چوٹ لگتی ہے ہمارے اور چلاتی ہے ماں

بھوکا سونے ہی نہیں دیتی یتیموں کو کبھی
جانے کس کس سے کہاں سے مانگ کر لاتی ہے ماں

ہڈیوں کا رس پلاکر اپنے دل کے چین کو
کتنی ہی راتوں کو خالی پیٹ سوجاتی ہے ماں

جب کھلونے کو مچلتا ہے کوئی غربت کا پھول
آنسووں کے ساز پر بچے کو بھلاتی ہے ماں

ماردیتی ہے طمانچہ گر کبھی جذبات میں
چومتی ہے لب کبھی رخسار سہلاتی ہے ماں

کب ضرورت ہو مِری بچے کو اتنا سوچ کر
جاگتی رہتی ہے ممتا اور سوجاتی ہے ماں

گھر سے جب پردیس کو جاتا ہے گودی کا پلا
ہاتھ میں قرآں لئے آگن میں آجاتی ہے ماں

دیکے بچے کو ضمانت میں رضائے پاک کی
سامنا جب تک رہے ہاتھوں کو لہراتی ہے ماں

لوٹ کر واپس سفر سے جب بھی گھر آتے ہیں ہم
ڈال کر باہیں گلے میں سر کو سہلاتی ہے ماں

ایسا لگتاہے کہ جیسے آگئے فردوس میں
کھینچ کر باہوں میں جب سینے سے لپٹاتی ہے ماں

دیر ہوجاتی ہے گھر آنے میں اکثر جب ہمیں
ریت پہ مچھلی ہو جیسے ایسے گھبراتی ہے ماں

مرتے دم بچہ نہ آئے گھر اگر پردیس سے
اپنی دونوں پتلیاں چوکھٹ پہ رکھ جاتی ہے ماں

حال دل جاکر سنا دیتا ہے معصومہ کو وہ
جب کسی بچے کو اپنی قم میں یاد آتی ہے ماں

تھام کر روضے کی جالی جب تڑپتاہے کوئی
ایسا لگتاہے کہ جیسے سر کو سھلاتی ہے ماں

گمرہی کی گرد جم جائے نہ میرے چاند پر
بارش ایمان میں یوں ہرروز نھلاتی ہے ماں

اپنے پہلو میں لٹاکر روز طوطے کی طرح
ایک بارہ پانچ چودہ ہم کو رٹواتی ہے ماں

عمر بھر غافل نہ ہونا ماتم شبیر سے
رات دن اپنے عمل سے ہم کو سجمھاتی ہے ماں

دوڑ کر بچے لپٹ جاتے ہیں اس رومال سے
لےکے مجلس سے تبرک گھر میں جب آتی ہے ماں

یاد آتا ہے شب عاشور کا کڑیل جواں
جب کبھی الجھی ہوئی زلفوں کو سلجھاتی ہے ماں

اللہ اللہ اتحاد صبر لیلا اور حسین
باپ نے کھینچی سناں سینے کو سہلاتی ہے ماں

سامنے آنکھوں کے نکلے گر جواں بیٹے کا دم
زندگی بھر سر کو دیواروں سےٹکراتی ہے ماں

سب سے پہلے جان دینا فاطمہ کے لال پر
رات بھر عون ومحمد سے یہ فرماتی ہے ماں

یہ بتا سکتی ہے بس ہم کو رباب خستہ تن
کس طرح بن دودھ کے بچے کو بھلاتی ہے ماں

شمر کے خنجر سے یا سوکھے گلے سے پوچھئے
ماں ادھر منھ سے نکلتاہے ادہر آتی ہے ماں

اپنے غم کو بھول کر روتے ہیں جو شبیر کو
ان کے اشکوں کے لئے جنت سے آجاتی ہے ماں

باپ سے بچے بچھڑجائیں اگر پردیس میں
کربلا سے ڈھونڈنے کوفے میں خود آتی ہے ماں

جب تلک یہ ہاتھ ہیں ہمشیر بے پردہ نہ ہو
ایک بہادر باوفا بیٹے سے فرماتی ہے ماں

جب رسن بستہ گزرتی ہے کسی بازار سے
ایک آوارہ وطن بیٹی کو یاد آتی ہے ماں

شکریہ ہو ہی نہیں سکتا کبھی اس کا ادا
مرتے مرتے بھی دعا جینے کی دے جاتی ہے ماں

قرآن میں ہیروگلیف، تفسیر قرآن میں ایک نیا باب

2009-10-05T05:34:00.002+03:30

بسم اللہ الرحمن الرحیم

قرآن میں ہیروگلیف، تفسیر قرآن میں ایک نیا باب

شاید آپ کو بھی یہ عنوان پڑھ کر تعجب ہوا ہو، کہ قرآن اور ہیروگلیف میں کیا ربط ہے۔ مجھے بھی اس عنوان کی کتاب دیکھ کر بہت تعجب ہوا۔ پہلے تو یہ سمجھا کہ ایسے ہی عنوان دیا ہے کتاب کی طرف راغب کرنے کے لیے۔ لیکن جب اٹھا کر دیکھی تو معلوم ہوا کہ نہیں مولف نے واقعا قرآن میں ہیروگلیف ڈھونڈ نکالی ہے۔ خیر کتاب خریدی۔ اصل عربی تو نہیں ملی، ترجمہ ہی پڑھ ڈالا، بہت مزہ آیا۔ کیونکہ مولف نے تفسیر کلام الہی میں ایک نیا باب کھولا ہے، اور کہا جاسکتا ہے کہ کافی حد تک کامیاب ہوا ہے۔ بعض الفاظ کا بہت اچھا ترجمہ کیا ہے۔

یہ کتاب جناب سعد عبدالمطلب العدل نے لکھی ہے۔ یہ ایک مصری محقق، ماہر قرآنیات، تاریخ اورادیان ہیں۔ انہوں نے ایک سلسلہ کتب لکھی ہے جس کا عنوان ہے، "الہیروغلیفیہ تفسر القرآن الکریم"۔ اس عنوان کے تحت، ابھی تک چار کتابیں لکھی ہیں۔

۱۔ شرح ما یسمی بالحروف المقطعہ

۲۔ السبع المثانی لیست صورۃ الفاتحہ

۳۔ اخناتون ابوالانبیا

۴۔ الخلیل اخناتون فی القرآن الکریم

فی الحال اس سلسلے کی پہلی کتاب کا مطالعہ کیا ہے۔ اصل عربی دستیاب نہ ہونے کی وجہ سے اس کا ترجمہ پڑھا۔

اس کتاب کے مقدمے میں مولف نے چند مقدمات بیان کرنے کے بعد، لکھا ہے کہ مصری زبان جسے آجکل ہیروگلیف کہتے ہیں، رسول اکرم صلی اللہ علیہ و آلہ کے زمانے تک غالب زبان تھی، یعنی اکثر لوگ اس زبان سے واقف تھے یا اس زبان میں ہی گفتگو کرتے تھے۔

انہوں نے لکھا ہے کہ مصری زبان بہت پرانی زبان ہے، اور عربی اس زبان سے بہت زیادہ اثر پذیر رہی ہے، جس کی وجہ سے بہت سے الفاظ اور نام مصری اور عربی زبان مین مشترک ہیں۔ مثال کے طور پہ انہوں نے، برک، ختم پیش کیا ہے اور ناموں میں، تیماء، فدک، تبوک، حجاز، خیبر، مکہ، طائف، یثرب اور ۔۔۔ پیش کیے ہیں اور کہتے ہیں کہ یہ سب نام عربی نہیں، بلکہ مصری ہیں۔ اس کے ساتھ ان الفاظ اور اسامی کی مصری شکل اور ترجمہ بھی پیش کیا ہے۔

ان کے علاوہ قرآنی الفاظ کا بھی ذکر کرتے ہیں، جو ان کے مطابق عربی نہیں، بلکہ مصری ہیں، ان الفاظ میں سے ایک "علق" ہے۔ جو سورہ علق کی دوسری آیت میں آیا ہے۔ اس لفظ کے بارے میں فرماتے ہیں، کہ چونکہ یہ لفظ ظاہری طور پہ لفظ "علقہ" کی طرح ہے مفسرین اس کا ترجمہ 'جما ہوا خون' کرتے ہیں۔ جو درست نہیں، کیونکہ "علقہ" عربی میں صرف مونث شکل میں استعمال ہوا ہے اور مذکر صورت [یعنی 'علق'] میں استعمال نہیں ہوا ہے۔ اس کے علاوہ ان آیات میں پڑھنے لکھنے کے بارے میں گفتگو ہو رہی ہے، یہ معنا سیاق و سباق سے تناسب نہیں رکھتا۔ لیکن صحیح یہ ہے کہ یہ لفظ مصری زبان کا ہے، اور مصری زبان میں اس کا مطلب عقل، فکر، فہم اور سمجھ ہے۔ اب اگر اس بات کی روشنی میں ترجمہ کیا جائے تو معلوم ہو گا کہ یہ لفظ کتنا مناسب ہے۔ اصل میں یہاں انسان اور حیوان کے تمایز کی بات ہورہی ہے جو عقل، فکر اور سمجھ ہے۔ اسی لیے پڑھنے اور قلم کا ذکر کیا ہے۔

کچھ اور قرآنی الفاظ کا بطور مثال ذکر کیا ہے جو اصل میں مصری ہیں۔ وہ یہ ہیں: الصاخہ، الحاقہ، الحطمۃ، حور عین، سمک، فردوس، برزخ۔ ان سب کے ساتھ بھی مصری شکل اور ترجمہ لکھا ہے۔

حروف مقطعہ کے بارے میں فرماتے ہیں کہ یہ حروف نہیں، بلکہ مصری الفاظ ہیں جو قرآن میں حروف کی شکل میں لکھے گئے ہیں۔ ان حروف کو مولف نے 'رمز' لکھا ہے۔ یعنی مثلا "کہیعص" یہ ایک رمز ہے جو پانچ مصری الفاظ سے بنا ہے، کاف + ھَ + یَ +عیین + صاد۔ ان میں سے ہر لفظ کی ہیروگلیف شکل اور ترجمہ کے بعد اس رمز کا جملے کی شکل میں ترجمہ پیش کیا ہے۔

اسی طرح تمام حروف مقطعہ کا ترجمہ کیا ہے، اگر مجھے توفیق ملی تو ان شاء اللہ اس کتاب کے چند اقتباس تصاویر کے ساتھ یہاں پیش کروں گا۔

یہ اس لیے میں نے لکھا کہ اگر آپ کو تفسیر قرآن کا شوق ہو ، تو یہ کتاب ضرور پڑھیں۔ مولف کی نظر سے متفق ہونا ضروری نہیں، لیکن پھر بھی یہ کتاب پڑھنے کے لائق ہے۔

والحمد للہ العلی

سید محمد نقوی

عید پر ایک تحفہ

2009-09-21T03:00:00.002+04:30

بسم اللہ الرحمن الرحیم

سوچا عید پر خالی مبارک باد سے تو کام نہیں چلے گا، کیوں نہ ایک تحفہ بھی ساتھ دے دیا جائے۔ نہج البلاغہ میں ایک بہت اچھا تحفہ ملا جو حاضر خدمت ہے۔

قال الامام امیرالمومنین علی بن ابی طالب علیہ السلام فی بعض الاعیاد۔

اِنَّمَا ھُوَ عیِدٌ لِّمَنْ قَبِلَ اللہُ صِیَامُہُ، وَ شَکَرَ قِیَامَہُ۔

وَ کُلُّ یَوْمٍ لَّا یُعْصیٰ اللہُ فِیہِ فَھُوَ یَوْمُ عِیدٍ۔

ترجمہ

حضرت امام امیرالمومنین علی علیہ السلام نے کسی عید کے موقع پر فرمایا:

یہ عید تو اسی کی ہے جس کے روزے خدا قبول کرے، اور عبادت منظور ہوجائے،

اور (اصل میں تو) جس دن خدا کی نافرمانی نہ کی جائے وہ عید ہے۔

[نہج البلاغہ-ملفوظات 422-ترجمہ: جناب علامہ سید مرتضی حسین فاضل لکھنوی رحمۃ اللہ علیہ]

تمام مسلمانوں کو عید الفطر مبارک ہو، اس دعا کے ساتھ کہ یہ عید حقیقتا ہم سب کی عید ہو۔ ان شاء اللہ

اسعد اللہ ایامکم و تقبل اللہ اعمالکم

محتاج دعا

سید محمد نقوی

عید الفطر ۱۴۳۰

اے صاحبان خرد، عبرت حاصل کرو۔۔۔

2009-09-19T00:08:00.002+04:30

بسم اللہ الرحمن الرحیم

سبحان الذی اسری بعبدہ لیلا من المسجد الحرام الی المسجد الاقصی الذی بارکنا حولہ

رمضان المبارک اپنے اختتام پر ہے۔ آج جمعۃ الوداع ہے۔ سڑک سے مجھے امریکہ مردہ باد، اور اسرائیل مردہ باد کے نعروں کی آواز آرہی ہے۔ مسلمانوں کا ایک عظیم اجتماع جو ہر سال جمعۃ الوداع میں اسراءیل اور امریکہ کے خلاف احتجاج کر کے، فلسطینی عوام کا ساتھ دیتا ہے۔ میری کوشش رہا کرتی تھی کے اس احتجاج میں شریک ہوں۔ جب سے بہت چھوٹا تھا، اس میں شریک ہوتا آرہا ہوں۔

لیکن ہمیشہ مجھے تعجب ہوتا تھا کہ اس کا فائدہ کیا ہے۔ یہ ہی لوگ جو آج نعرے لگا رہے ہیں۔ اگر کل ان کو امریکا کی شہریت ملنے کا موقع نصیب ہو، بھاگتے ہوئے وہاں پہنچ جائیں گے۔ احتجاج ختم ہوتے ہی ان کی بنائی ہوئی فلمیں دیکھیں گے۔ ان کی بنائی ہوئی چیزیں استعمال کریں گے۔ حد تو یہ ہے کہ آجکل تقریبا ہر اس بندے کے ہاتھ میں آپ کو اسرائیل سے منسلک کمپنی کا موبائل فون نظر آئے گا جو اسرائیل کا مخالف ہو گا۔ کیا اس احتجاج کا کوئی فائدہ ہوگا؟

میرا مطلب یہ نہیں کہ احتجاجات نہ ہوں۔ کچھ نہ کریں تو احتجاج ہی کرتے رہیں۔ لیکن کیا یہ کافی ہے۔ آج میں یہی سوچ رہا تھا۔ کہ ہمارا فریضہ کیا ہے؟

اس وقت اسرائیلی یہودی تقریبا دنیا پر اقتصادی یا سیاسی لحاظ سے قابض ہیں۔ ہمیں کیسے ان کا مقابلہ کرنا ہوگا؟

یہ لوگ اگر آج اس جگہ پہنچے ہیں تو یہ ان کی سو یا ہزار پشتوں کی کاوش کا نتیجہ ہے۔ یہودیوں کی تاریخ پر اگر نظر دوڑائی جائے تو واضح نظر آئے گا کہ انہوں نے بہت عرصے سے ان دنوں کے لیے منصوبے بنا رکھیں تھے۔

اس کی ایک واضح مثال نبی اکرم صلی اللہ علیہ و آلہ کے دور میں ملتی ہے۔ یہودی مدینے کے باشندے نہیں تھے۔ لیکن جب وہاں رہنے لگے تو کچھ عرصے میں اس مقام پر پہنچے کے، خود مدینے والوں سے زیادہ امیر ہو گئے، ان کی زمینوں پر قابض ہو گئے، اور سیاسی طور پر بھی مضبوط ہوگئے۔ یہ رسول کریم صلی اللہ علیہ وآلہ کی سیاسی حکمت علمی تھی کہ آپ ص نے ان کے ہاتھ کاٹ دیے اور ان کو مدینے سے نکال دیا۔ اگر مسلمان اس راہ پر چلتے تو ہمیں یہ دن دیکھنے نصیب نہ ہوتے۔ لیکن افسوس یہ ہے کہ آپ ص کے بعد مسلمانوں نے اس راہ کو چھوڑ کر دوبارہ انھی یہودیوں سے دوستی شروع کردی جو ہمارے لیے نہایت مضر ثابت ہوئے۔

یہ ہی نمونہ فلسطین میں ہوا۔ آہستہ آہستہ یہودی فلسطین پر قابض ہو گئے۔ اور مسلمانوں کو دوبارہ راہ نبی صلی اللہ علیہ وآلہ سے دوری کا مزہ چکھنے کو مل گیا۔

کیا آج، یہ حالت ہمارے لیے مقام فکر نہیں۔ جبکہ ہمارے ملک میں بھی فلسطین کی طرح قبضہ جمانے کی سازشیں شروع ہو گئی ہیں۔ اپنے ہی ملک میں ہم امریکی مجرموں سے ڈرتے ہیں۔ اگر صورتحال ایسی ہی رہی، تو دور نہیں ہیں وہ دن جب ہم بھی مظلوم فلسطینیوں کی طرح اپنے گھربار سے آوارہ دوسرے ملکوں میں پناہ ڈھونڈتے پھریں گے، یا اپنے ملک میں مجرموں کی جوتیاں سیدھی کریں گی۔

آج کے دن احتجاج کے ساتھ ہمیں یہ سوچنا چاہیے، کہ ان حالات سے کیسے نجات حاصل کریں۔ صرف نعرے لگانے سے امریکہ، اسرائیل ختم نہیں ہو جائیں گے۔

جو چیز سب سے زیادہ ان کی مدد کرتی ہے وہ یہ ہے کہ ہماری قوم جہالت میں رہے، اس زیادہ ان کے لیے مفید یہ ہے کہ ہم پڑھے لکھے جاہل ہوں۔

اگر اربوں جاہل ان کے خلاف نعرے لگائیں، ان پر کوئی اثر نہ ہوگا۔ لیکن اگر چند، بقول قرآن کریم کے "فئۃ قلیلۃ" عالم اور دانشور ایک نعرہ لگائیں ظلم کی بنیادیں ہل جائیں گی۔ جیسے ولادت نبوی صلی اللہ علیہ و آلہ پر قصر کسری کے ۱۴ ایوان گرے تھے، وہ نہ فقط ایک معجزہ، بلکہ ایک نشانی تھی کہ علم اور اخلاص کی قدرت دکھانی تھی۔

امید ہے کہ اس عظیم مہینے کی برکت سے مسلمانوں میں یہ شعور جاگ جائے کہ اختلافات کو چھوڑ کر، اپنے مسائل کو خلوص کے ساتھ حل کریں۔ اپنے ملکوں کو خیرباد کہہ کر غیر ملکوں میں غیروں کی غلامی چھوڑ دیں، اپنے ملک و قوم کی ترقی اور بہبود کی کوشش کریں۔

مجھے لگتا ہے وہ دن نزدیک ہیں۔

ایک ضروری بات یہ ہے، کہ یہودی سے میرا مطلب ہر یہودی نہیں ہے، کیونکہ اکثر عام یہودی، ہر قوم کی طرح بے گناہ ہیں۔ بلکہ مراد وہ اکبر یہود ہیں، جو جان بوجھ کر اسلام اور مسلمانوں کا نام مٹانا چاہتے ہیں۔-

فاعتبروا یا اولی الابصار

اس کے ساتھ ہی آپ سب کو ایک شعور انگیز عید مبارک ہو۔

والحمد للہ العلی

جمعۃ الوداع ۱۴۳۰

سید محمد نقوی

باپ

2009-07-13T10:38:00.002+04:30

بسم اللہ الرحمن الرحیم

چند دنوں قبل رجب کی تیرہ تاریخ تھی۔ امت مسلمہ کے باپ کی ولادت کادن تھا۔ میں نے سوچا کہ امام علی علیہ السلام کے متعلق ہی کچھ لکھ دوں، لیکن اپنے قلم کی حقارت اور ان کی عظمت دیکھ کر، اس موضوع پر قلم زنی کو کسی اور موقع پر چھوڑ دیا۔ کہاں امیرالمومنین اور کہاں میرا ناتواں قلم۔

رسول اکرم صلی اللہ علیہ و آلہ اور علی علیہ السلام مسلماں قوم کے والد ہیں۔ اگر اس عظیم دن میں ان دو عظیم تر ہستیوں کے بارے میں لکھنے کا قابل نہیں کم از کم ان کو خراج تحسیں تو پیش کر سکتا ہوں۔ تو آج کے دن یہیں سے اپنی کمپیوٹر کے سامنے بیٹھ کر ان دو ہستیوں کو سلام پیش کرتا ہوں۔ اور دعا کرتا ہوں کہ ان کے صدقے انسانوں کو اس پست حالت سے، نکال کر، خدا ہم سب کی ہدایت کرے، ہوش دلائے، انساں کی عظمتوں کا احساس دلائے۔ ہمیں وہ دن دکھائے کہ جب دین کے نام پر انسانوں کا قتل اور بے حرمتی نہ ہو۔ جب انسانیت سستے داموں بیچی نہ جائے۔ آمین

ان دنوں ایک بات اور بھی دل میں ہے جو آج مناسبت کی خاطر لکھ دینا چاہتا ہوں۔ ہم جس دور میں رہ رہے ہیں، دنیا ترقی یافتہ ہوگئی ہے۔ لوگوں کے پاس وقت کم ہے، یا یوں کہوں کہ لوگوں نے خود کو اتنا مصروف کر لیا ہے کہ وقت کم رہ جاتا ہے۔ زندگی کے تقاضے بدل گئے ہیں، اور طرز زندگی تو تقریبا بالکل بدل گیا ہے۔ اس میں بہت سی خوبیاں ہیں اور بہت سی خامیاں۔ ان خامیوں میں سے ایک یہ ہے، کہ خاص طور پہ مغربی معاشرے میں اور ان کی اتباع میں ہمارے مشرقی معاشرے میں بھی باپ کا احترام کم کیا جا رہا ہے۔ مغرب نے ترقی پانے کے لیے ایک قربانی خاندان کی دی۔ انہوں نے ترقی کی منزلیں طی کرنے کے لیے، خاندانی اور فیملی کا نظام ختم کردی۔ یہاں تک کے خاندانی رشتوں کا اعتبار اور احترام ختم کردیا۔ میں اس موضوع پر لمبی بحث کرنا نہیں چاہتا۔ بس اس لیے یہ لکھ دیا تا کہ ہمیں احساس ہو کہ ہم کہاں جا رہے ہیں۔ کہیں دنیا کی ترقی ہمیں انسانی قدروں سے دور نہ کر دے۔ مغرب ہر بات میں اندھی نقل ہمیں کہاں لے جا رہی ہے۔ تھوڑی دیر اس موضوع پر سوچا جائے۔ کہ کیا اگر وہ ترقی کر گئے ہیں تو ان کی ہر بات میں نقل کرنی چاہیے؟

ہاں کوئی معاشرہ ایسا نہیں جس میں خوبیاں نہ ہوں۔ مغربی معاشرے میں بھی خوبیاں ہیں۔ ہم ان کی خوبیاں کیوں نہیں دیکھتے، ہمیں صرف ان کی عیاشی اور اس طرح کی برائیاں کیوں نظر آتی ہیں۔ اگر وہ ترقی کر پائے تو اس میں ان کی خوبیاں زیادہ شامل تھیں، نہ عیاشیاں۔ کچھ دیر ہمیں ان مسائل پر غور کرنا چاہیے۔

بات باپ کے احترام کی کر رہا تھا۔ آج کے دن میں نے سوچا کہ کس طرح اپنے والد کو خراج تحسین پیش کروں۔ والد سے مراد میرا صرف میرے بابا نہیں، بلکہ دادا، نانا، پر دادا، پر نانا، ماں، نانی، دادی، پر نانی، پر دادی اور ۔۔۔ سب مراد ہیں، ہر وہ شخص جو میری فکری اور ذہنی تربیت کرنے میں شریک ہے۔ میں ان سب کو سلام اور آداب پیش کرتا ہوں۔ جو اگر نہ ہوتے، اور ان کی محنتیں نہ ہوتیں تو نہ جانے اس بڑی دنیا میں، میں کہاں ہوتا۔ میں ان سب کا نام لانے سے قاصر ہوں۔ لیکن ہدیہ کے طور پہ ایک نظم لکھی ہے جو پیش کرتا ہوں۔ اس میں اپنے بعض محسنوں کا نام لاسکا ہوں، یعنی والد، والدہ، پر دادا مرحوم، دادا مرحوم اور نانا ابو کا جنہیں اللہ طول عمر عطا کرے۔ میں شعر کہنے میں بہت اچھا نہیں ہوں، امید ہے کہ یہ بزگوار میری اس گستاخی کو معاف کرِن گے۔ اور آپ پڑھنے والے بھی میری نظر خراشی کو۔ اللہ ہمیں، اپنے والدین کا حق ادا کرنے میں کامیاب کرے۔ آمین۔۔

*****

میرے ہاتوں کو قلم سے آشنا کس نے کیا؟

کس نے دل میں عشق احمد ﷺ کا جلایا ہے دیا؟

میں نے مانا کہ یہ سب ہے میرے رب کی ہی عطا

پر مجھے یہ تو بتا، رب آشنا کس نے کیا؟

مرتضی ہے کہ مثنی یا کہ آغا بارہوی

فاضل بن فاطمہ کو جو ملا اِن سے ملا

یہ بزرگوں کا کرم ہے، اور انہی کی محنتیں

ورنہ میں تو لائق مداحی حیدر نہ تھا

شکر اے رب، اے خداے ذوالمنن والا مکاں

تیرے در پر اس سراپا عجز کی ہے التجا

میرے محسن ہیں بہت دونوں جہاں میں، محو حمد

ان کو تو ہرگز نہ کرنا اپنی رحمت سے جدا

و الحمد للہ العلی

۲۰ رجب ۱۴۳۰

سید محمد نقوی (فاضل)

میری پہلے غزل

2009-03-19T06:55:00.002+03:30

بسم اللہ الرحمن الرحیم

مجھے بچپنے سے ہی شعر و شاعری کا شوق تھا۔ کچھ بچپنے میں، بچوں والے شعر کہے بھی تھے جو ضایع ہو گئے۔ [اچھا ہی ہوا۔ محفوظ ہونے کے قابل بھی نہ تھے۔] کچھ عرصے پہلے میں نے اس شوق پہ دوبارہ توجہ دی اور شعر کہنے کی کوششیں شروع کی جس کے نتیجے میں سب سے پہلے کچھ قصیدے اور ایک غزل لکھی جو پیش کر رہا ہوں۔ چاہتا تھا کہ پہلے قصیدہ پیش کروں لیکن میری کوشش ہے کہ اس کو کچھ بہتر کرلوں پھر انشا اللہ پیش کروں گا۔ امید ہے کے اپنی بیش قیمت آراء سے نوازیں گے۔ شکریہ

مجھے کچھ اے مرے ساقی پلاؤ
ذرا اک ساغر عالی پلاؤ

مری تشنہ دہانی کہہ رہی ہے
مجھے کچھ بہر سیرابی پلاؤ

مرا رونے کو دل کرتا ہے ساقی
مجھے کچھ بہر دلداری پلاؤ

مرا ساغر بہت چھوٹا ہے ساقی
مجھے اب جام سے عاری پلاؤ

نہیں بھاتی ہے اب دنیاے فانی
بقا کا مجھ کو اب پانی پلاؤ

یہ ہے میخانہ عشق محمد
مجھے اے احمد ثانی پلاؤ

سید محمد نقوی

عید میلاد النبی صلی اللہ علیہ و آلہ و سلم

۱۷ ربیع الاول ۱۴۳۰

مدح جعفر میں ہی مضمر ہے پیمبر کی ثنا

2009-03-19T06:26:00.002+03:30

بسم اللہ الرحمن الرحیم

شب عید میلاد النبی کو ایک محفل میں شرکت کا اعزاز حاصل کیا۔ وہاں میرے دوست جناب سید یونس حیدر رضوی صاحب نے ایک قصیدہ پڑھا جو مجھے سب سے زیادہ پسند آیا۔ اسی لیے ان سے اجازت لے کر اس کو یہاں نقل کر رہا ہوں۔ امید ہے کہ آپ کو بھی پسن آئے۔ یہ قصیدہ حضرت رسول اکرم صلی اللہ علیہ و آلہ و سلم اور حضرت امام جعفر صادق علیہ السلام کے بارے میں ہے۔ قصیدہ یہ ہے:

پوچھیے اہل خرد سے ماہ اختر کی ثنا

پر مہ تاباں کرے گا بس پیمبر کی ثنا

نور احمد سے چراغاں ہو کے مکہ کی زمیں

کر رہی ہے جھوم کر ماہ منور کی ثنا

کب تلک اتراے گا یہ ماہ اپنے حسن پر

ہو کے ٹکڑے وہ سناے گا پیمبر کی ثنا

تذکرہ جب بھی چھڑے گا انجم خورشید کا

ہو گی بس زہرا کے در کی اور حیدر کی ثنا

اب بھی آتی ہے غدیر خم سے یہ پیہم صدا

حق کا متوالا ہی کرسکتا ہے منبر کی ثنا

فاصلہ الفت کا ہوجائے گا کچھ نزدیک اور

کر لے اک لمحہ زلیخا گر پیمبر کی ثنا

دیکھ کر انوار اہل بیت آدم نے کہا

مدح جعفر میں ہی مضمر ہے پیمبر کی ثنا

دیکھیے قرآن و عترت کا انوکھا امتزاج

سر ہے نیزے پہ مگر لب پر ہے داور کی ثنا

آج یونس مل گیا پروانہ جنت مجھے

کر رہا تھا محفل مدحت میں جعفر کی ثنا

جناب سید یونس حیدر رضوی

عید میلاد النبی صلی اللہ علیہ و آلہ و سلم

۱۷ ربیع الاول ۱۴۳۰

محبت ۲

2009-02-24T18:26:00.002+03:30

بسم اللہ الرحمن الرحیم

جیسا کہ پچھلی تحریر میں عرض کیا تھا۔ جب بھی انسان کی محبت میں جھول آیا اور گمراہ ہوئی تو خدا نے ایک نبی بھیجا۔ جو محبت کرکے لوگوں کی محبت کی اصلاح کرتا تھا۔

اس کام طلب یہ نہیں کہ لوگ محبت کرنا چھوڑ دیا کرتے تھے۔ نہیں۔ بلکہ لوگ محبت کرتے رہتے تھے۔ محبت کرنا تو فطرت انسانی کا تقاضا ہے۔ وہ محبت کرتے تھے، لیکن ان کا محبوب غلط ہوتا۔

وہ محبت کرتے مگر سونے چاندی کے سکوں سے، باغات سے، زمینوں سے، کھانوں سے، مختصر یہ کہ بے ارزش دنیاوی چیزوں سے۔ جب اس مقدس انسانی محبت میں اس قدر گمراہی آگئی، اور اس محبت نے عقل انسانی کو اندھا کر دیا۔ تو خدا نے انسان کو ہوش دلانے کے لیے نبی بھیجے۔ مختلف زمانوں میں مختلف انبیاء، آئے۔ کبھی نوح، کبھی موسی، ابراہیم، اسماعیل علیہم السلام اور بہت سارے۔ ہر کسی نے آکر انسان کو محبت کرکے دکھایا کہ محبت کس سے اور کس طرح کرنی چاہیے۔

ان تمام مظاہر محبت و عشق کو اگر دیکھنا ہو، تو عمر انسانی بہت قلیل ہے۔

آج میں ان میں سے ایک کے بارے میں کچھ لکھنا چاہتا ہوں۔ آج وہ دن ہیں جس میں ہم اپنے عظیم الشان اور پیارے نبی، حضرت محمد مصطفی صلی اللہ علیہ و آلہ و سلم سے بچھڑ گئے۔ آج مدینے میں غم کی فضا طاری ہے۔ میرا دل کھتا ہے کہ نبی اکرم کے بستر کے گرد فرشتوں کا ہجوم ہو گا۔ نہایت احترام کے ساتھ آپ ص کی روح اللہ تعالی سے ملنے جا رہی ہوگی۔ کیا عالم سرور و مستی ہو گا جب حبیب و محبوب، عاشق و معشوق کے وصال کا وقت آیا ہوگا۔ سرور تو عرش میں ہو گا۔

ذرا زمین کو بھی دیکھیں، اہالی زمین اپنے محبوب سے جدا ہو رہے ہیں۔ کتنا سخت ہے۔عجب نہیں کہ شدت غم سے دیواریں لرز رہیں ہو، آسماں سرخ ہو، ہوائیں شدید ہوں۔ کیوں، اس لیے کہ عالم امکاں کا محبوب، دنیا کو چھوڑ رہا ہے۔ آل نبی ص خون کے آنسو بہا رہے ہیں۔ فراق ہحبوب کتنا سخت ہے۔

کیوں دنیا ان کے جانے سے اتنی مغموم ہے؟

کیا انہوں نے دنیا والوں کو پیسا دیا، دولت دی۔ میں کہوں گا کہ نہیں، انہوں نے صرف محبت دی۔ کس کو سب کو، وہ حجر ہوں کہ شجر، انس ہوں کہ جن، جاندار ہوں کہ بے جان۔ سب کو محبت دی۔ اور محبوب حقیقی کی پہچان کرائی۔

رسول اکرم صلی اللہ علیہ و آلہ و سلمنے انسانوں کو اتنی محبت دی کے آج بھی۱۴۲۰ سال گذرنے کے باوجود، آپ ص کے وفات کے دن۔ جو بھی انھے جانتا ہے، مغموم ہوتا ہے، چاہے اظہار نہ کرے۔

گویا رسول اکرم صلی اللہ علیہ و آلہ و سلم کا مسلمانوں اور انسانوں کے لیے یہ ہی پیغام تھا کہ محبت کرو، اور ٹوٹ کے کرو۔ جب محبوب مانگے تو مال، جان، عزت، بیوی، بچے، گھر، خاندان ،۔۔۔۔ جو بھی ہو دے دو۔ اگر غور کیا جاے تو سیرت نبوی ص میں یہ ہی ملے گا۔ آپ ص نے اپنی تمام دولت اسلام پر خرچ کر دے، جناب خدیجہ نے بھی ایسا ہی کیا۔ اپنی عزت اسلام کے لیے گنوا دی، یہاں تک کہ عرب محمد امین ص کو، شاعر، مجنون اور نعوذ باللہ کیا کیا کہنے لگے۔ لیکن آپ ص اپنے رستے پر ثابت قدم رہے۔ ایسے نمونے زندگی میں تو بہت ہے۔ آگے آئیے۔ اللہ کے نام پر وفات کے بعد بھی ایسی قربانیاں دیں کہ گننے میں نہیں آتیں، حضرت فاطمہ س، حضرت امام علی ع، حضرت امام حسن ع، حضرت امام حسین ع، ۔۔۔۔۔۔۔۔۔۔۔۔

ایسی محبت جو آج تک برقرار ہے۔ رسول اکرم صلی اللہ علیہ و آلہ و سلم نے انسانوں کو یہ بتایا کہ، لائق محبت صرف خدا ہے۔ صرف خدا سے محبت کرو۔

اگر خدا سے محبت کر لی۔ تمام مسائل آسان ہو جائین گے۔ کیوں؟ اس لیے کہ جب انسان کسی سے حقیقی محبت کرتا ہے، تو ایسا بنتا ہے جیسا اس کا محبوب چاہتا ہے۔ محبوب اچھا ہو تو انسان اچھا بننے کی کوشش کرتا ہے۔ اگر نہ ہو تو ۔۔۔۔۔۔۔۔

بہت لمبی بات ہو گئی، اب ہمیں یہ چاہیے کہ اپنے رہبر، حضرت محمد صلی اللہ علیہ و آلہ و سلم کی طرح عمل کریں۔ خدا سے محبت کریں، اور آپس میں اس محبت کو بڑھائیں۔ تا کہ ہمارا محبوب ہم سے راضی ہو۔

اس محبت کا وسیلہ آج کے مسافر کو قرار دیں۔ ان کی طرح زندگی کریں۔ اگر کسی کو چاہیں تو خدا کی خاطر۔ اگر دشمنی کرین تو خدا کی خاطر۔

اگر ہم نے یہ کر لیا، تو تمام مسائل جو جہاں اسلام، بلکہ تمام دنیا میں ہیں، بہت جلد حل ہو جائیں گے۔ ان شاء اللہ

آئیں مل کر محبت کریں

آج ہی سے رسول محبت ص کے نام سے شروع کریں

محبت ۱

2009-02-20T05:32:00.005+03:30

بسم اللہ الرحمن الرحیم

جب خدا نے انسان کو اپنا نمائندہ بنا کر اس دنیا میں بھیجا۔ اسے ایک نہایت اہم ہدایت فرمائی۔ خدا نے انسان سے کھا کہ ہمیشہ محبت کے راستہ پر چلنا۔ یہ یاد رکھنا کہ دنیا میں چند دن ہی رہنا ہے۔ تو اس چند دن میں ہی کرنا ہے جو بھی کرنا ہے۔ اس محبت کو کبھی بھی دشمنی میں نہ بدلنا۔ اگر ایسا ہوا، تو میں تو بہت رحم کرنے والا ہوں، اپنے کچھ بندوں کو تمہارے پاس بھیجوں گا تاکہ تمہاری راہنمائی کریں، اور اتنی محبت کریں، کہ تم اس راستہ پر آ جاو۔ یعنی اپنی اصلیت پر آ جاو۔ لیکن اگر پھر بھی تم کو ہوش نہ آیا تو جان لو میری سزا بھی میری رحمت کی طرح بے انتہا اور سخت ہوتی ہے۔ [ملاحظہ ہو: قرآن حکیم، بقرہ، 36-38]

اب اگر ہم انسانی زندگی کا غور سے مطالعہ کریں، تو ایک بات واضح نظر آے گی۔ جب بھی تاریخ میں انسانوں کی محبت میں جھول آتا ہے، کوئی ایسا شخص خدا کی طرف سے آتا ہے جو خود محبت کا پیکر ہوتا ہے، اور اپنے علاقے اور وقت کےلوگوں کی محبت کی تصحیح کرتا ہے۔ اس شخص کو نبی یا رسول کھتے ہیں۔ مختلف زمانوں میں ان کی مختلف مثالیں ملیں گی۔

جاری ہے، باقی اگلے چند دنوں میں۔۔۔ان شاء اللہ۔۔۔

بسم اللہ الرحمن الرحیم

2009-02-16T20:41:00.003+03:30

بسم اللہ الرحمن الرحیم

لکھنا، آسان نہیں۔ اور وہ بھی دیباچہ لکھنا ہو، تو اور مشکل ہوتا ہے۔ سمجھ میں نہیں آرہا شروع کہاں سے کروں۔

چلیں آغاز تو لگتا ہے ہو ہی گیا، نا خواستہ ہی صحیح۔

کافی عرصہ سے ایک بلاگ بنانے کا سوچ رہا تھا۔ جہاں اپنی باتیں کہ سکوں اور آپ کی آراء سے استفادہ کر سکوں۔ ڈر اس بات کا تھا کہ چلو شروع تو کر لو گے لیکن اس کام میں دوام کی ضرورت بھی ہے۔ اور دوام نہ پانے کے خوف سے ہر بار اسے چہوڑ دیا۔ آخر آج اربعین حسینی کے دن، امام حسین علیہ السلام سے مدد طلب کرکے اس کام کو شروع کرنے کا فیصلہ کر ہی لیا۔ اور عزم باندھ لیا۔ بقول مرحومہ پروین شاکر کے:

ہم نے جنگل میں بہی پیچھے نہیں مڑ کر دیکھا

کیا عجب عزم بندھا رخت سفر کے ہمراہ

خیر یہ تو ہے آغاز کی بات۔ بلاگ کے عنوان کے بارے میں بھی عرصے سے سوچ رہا تھا لیکن کوئی خاص نام پسند نہیں آرہا تھا۔ یہاں تک کہ چند دن قبل اردو محفل میں سید نصیر الدین نصیر صاحب کی ایک غزل پڑھی، جو جناب الف نظامی صاحب نے بھیجی تھی۔ اس کا ایک شعر اپنی ہی زبان حال لگا، تو اسی سے اس بلاگ کا نام انتخاب کیا ہے۔ وہ شعر یہ ہے:

تم نے دریا ہی کو دیکھا ہے اٹھاتے طوفاں
آج دیکھو کسی قطرے کا بھی طوفاں ہونا

میں نظامی صاحب کا مشکور ہوں، کہ اگر انھوں نے یہ غزل نہ بھیجی ہوتی تو شاید میں ابھی تک نام ہی سوچ رہا ہوتا۔

آخر میں اللہ تعالی سے میری دعا ہے کہ اس قطرہ کو طوفاں اٹھانے میں کامیاب کرے۔ ایسا طوفاں جو اسلام اور انسانیت کے لیے مفید ہو۔

والحمد للہ العلی

سید محمد نقوی - قطرہ

اربعین کے بہانے۔۔۔۔

2009-02-16T20:20:00.002+03:30

صدیوں سے ایک آواز گونج رہی ہے،

کربلا۔۔۔۔۔۔۔۔

جسے،

سن لے کوئی ظالم، تو لرز جاتاہے

۔۔۔۔۔۔۔۔۔کوئی مظلوم، سنبھل جاتاہے

۔۔۔۔۔۔۔۔۔کوئی عاشق، تو تڑپ جاتا ہے

۔۔۔۔۔۔۔۔۔کوئی عارف، یہ تو مر جاتا ہے۔ موت سے اپنی زمانے کو ہلا جاتاہے۔۔۔۔۔۔۔۔۔۔۔۔۔

سید محمد نقوی